'సైంధవ్'.. ఆ సీన్స్ మామూలుగా ఉండవట

హిట్, హిట్ 2 వంటి సినిమాలతో డైరెక్టర్ గా మంచి గుర్తింపు తెచ్చుకున్న శైలేష్ కొలను విక్టరీ వెంకటేష్ తో 'సైంధవ్' అనే సినిమాని తెరకెక్కించిన విషయం తెలిసిందే. హై వోల్టేజ్ యాక్షన్ అండ్ ఎమోషనల్ డ్రామాగా ఈ సినిమా రూపొందింది. ఈ సినిమాతోనే వెంకటేష్ పాన్ ఇండియా మార్కెట్లోకి అడుగుపెడుతున్నారు. వెంకీ మామ కెరియర్ లో ఎంతో ప్రతిష్టాత్మకంగా తెరకెక్కిన 75వ సినిమా కూడా ఇదే కావడం విశేషం.

దీంతో సినిమాపై ముందు నుంచే మంచి అంచనాలు ఉండగా రీసెంట్ గా రిలీజ్ అయిన ట్రైలర్ అంచనాలను తారస్థాయికి చేర్చింది. ట్రైలర్ అంతా ఫుల్ యాక్షన్ మోడ్ లో సాగడంతో ఫ్యాన్స్ తో పాటు ఆడియన్స్ ని ఎంతగానో ఆకట్టుకుంది. ఇప్పటికే ఈ సినిమా అన్ని కార్యక్రమాలను పూర్తి చేసుకొని విడుదలకు ముస్తాబవుతోంది. సంక్రాంతి కానుకగా ప్రేక్షకుల ముందుకు రాబోతున్న ఈ సినిమాకు సంబంధించి ప్రమోషన్స్ జోరుగా జరుగుతున్నాయి.

ఈ క్రమంలోనే తాజాగా మూవీ టీం ఓ స్పెషల్ ఇంటర్వ్యూ ప్లాన్ చేసింది ఈ ఇంటర్వ్యూలో సైంధవ్ క్లైమాక్స్ గురించి డైరెక్టర్ శైలేష్ ఆసక్తికర వ్యాఖ్యలు చేశారు." జెనరల్ గా ఒక సీక్వెన్స్ నుంచి సినిమా పుడుతుంది. అలాగే నేను కూడా సైంధవ్ సినిమాని స్టార్ట్ చేసిందే ఆ క్లైమాక్స్ సీన్ నుంచి. అక్కడ నుంచే ఈ సినిమా పుట్టింది. ఈ సినిమా క్లైమాక్స్ ని ఆడియన్స్ ఎంతో ఎంజాయ్ చేస్తారు. అంతేకాదు సినిమాలో క్లైమాక్స్ పోర్షన్ గూస్ బంప్స్ తెప్పిస్తుంది" అని చెప్పాడు.

డైరెక్టర్ చెప్పిన దాని ప్రకారం చివరి అరగంట సినిమా చాలా అద్భుతంగా ఉండబోతున్నట్టు తెలుస్తోంది. మరోవైపు సినిమాలో పెద్ద తారాగడమే ఉంది. వెంకటేష్ తో పాటు జెర్సీ మూవీ ఫేమ్ శ్రద్ధ శ్రీనాథ్, ఆండ్రియా జెర్మియా, తమిళ హీరో ఆర్య, నవాజుద్దీన్ సిద్ధిక్, జయప్రకాష్, ముఖేష్ రుషి.. లాంటి నటీ, నటులు ఈ సినిమాలో నటిస్తున్నారు. బాలీవుడ్ విలక్షణ నటుడు నవాజుద్దీన్ సిద్ధిక్ ఈ సినిమాతోనే టాలీవుడ్ కి ఎంట్రీ ఇస్తున్నాడు.

సినిమాలో ఆయన విలన్ రోల్ చేశారు. వెంకటేష్ కెరియర్ లోనే అత్యంత భారీ బడ్జెట్ తో రూపొందిన ఈ సినిమాని నిహారిక ఎంటర్టైన్మెంట్స్ బ్యానర్ పై వెంకట్ బోయినపల్లి నిర్మించారు. ఎస్. మణికందన్ సినిమాటోగ్రఫీ అందించిన ఈ సినిమాకి సంతోష్ నారాయణన్ సంగీతం సమకూర్చారు. జనవరి 13 తెలుగు, తమిళ్, కన్నడ, మలయాళ, హిందీ భాషల్లో ఈ సినిమా రిలీజ్ కానుంది.