సూపర్ స్టార్ సినిమాలో అమరన్ లేడట..!
అమరన్ సక్సెస్ నేపథ్యంలో పోస్ట్‌ ప్రమోషన్స్‌ లో భాగంగా శివ కార్తికేయన్‌ మీడియాతో మాట్లాడుతూ కూలీ సినిమా గురించి వస్తున్న వార్తలపై స్పందించాడు.
తమిళ్ సూపర్ స్టార్ రజనీకాంత్ ఇటీవలే వేట్టయాన్‌ సినిమాతో ప్రేక్షకుల ముందుకు వచ్చిన విషయం తెల్సిందే. ఆ సినిమా బాక్సాఫీస్‌ వద్ద ఆశించిన స్థాయిలో వసూళ్లు సాధించలేదు. ప్రేక్షకులు సైతం వేట్టయాన్‌ సినిమా విషయంలో పెదవి విరిచారు. తెలుగులో ఈ సినిమాకు మినిమం వసూళ్లు నమోదు కాలేదు. ఆ సినిమా ఫలితంతో సంబంధం లేకుండా ప్రస్తుతం రజనీకాంత్ చేస్తున్న కూలీ సినిమాపై అంచనాలు భారీగా ఉన్నాయి. అంచనాలకు ఏమాత్రం తగ్గకుండా స్టార్ దర్శకుడు లోకేష్‌ కనగరాజ్ కూలీ సినిమాను రూపొందిస్తున్నట్లు తెలుస్తోంది.
రజనీకాంత్ కూలీ సినిమాలో పలువురు ఇతర స్టార్ హీరోలు నటిస్తున్నారు. ముఖ్యంగా నాగార్జున, సత్యరాజ్, ఉపేంద్రలు నటిస్తున్న నేపథ్యంలో మరికొందరు సైతం ఈ సినిమాలో గెస్ట్ అప్పియరెన్స్ ఉండే అవకాశం ఉందని వార్తలు వస్తున్నాయి. గత కొన్ని రోజులుగా శివ కార్తికేయన్‌ ఈ సినిమాలో కీలకమైన గెస్ట్ రోల్‌లో కనిపించబోతున్నాడు అంటూ వార్తలు వస్తున్నాయి. ఇటీవల రెండు సార్లు శివ కార్తికేయన్‌ 'కూలీ' సినిమా సెట్స్ లో కనిపించడంతో సినిమాలో ఆయన ఉన్నాడు అనే వార్తలు జోరుగా వచ్చాయి. తాజాగా ఆ విషయమై శివ కార్తికేయన్‌ క్లారిటీ ఇవ్వడంతో ఇన్ని రోజుల వార్తలకు బ్రేక్ పడింది.
శివ కార్తికేయన్‌ తాజాగా నటించిన అమరన్ సినిమా ప్రేక్షకుల ముందుకు వచ్చింది. అన్ని భాషల్లోనూ అమరన్ సినిమాకు పాజిటివ్‌ రెస్పాన్స్‌ దక్కడంతో పాటు చాలా చోట్ల బ్రేక్ ఈవెన్‌ సైతం అయింది. అమరన్ సక్సెస్ నేపథ్యంలో పోస్ట్‌ ప్రమోషన్స్‌ లో భాగంగా శివ కార్తికేయన్‌ మీడియాతో మాట్లాడుతూ కూలీ సినిమా గురించి వస్తున్న వార్తలపై స్పందించాడు. కూలీ సినిమాలో తాను భాగం కాదని పేర్కొన్నాడు. తాను కూలీ సినిమా సెట్స్ కి వెళ్లిన మాట వాస్తవం అన్నాడు. అయితే ఆ సినిమాకు వర్క్ చేస్తున్న వారు నాకు సన్నిహితులు కావడం వల్ల వెళ్లానని కూడా అన్నాడు.
శివ కార్తికేయన్‌ కి రజనీకాంత్ అంటే అమితమైన అభిమానం ఉంది. ఆ అభిమానంతో కూలీ సినిమాలో నటించాల్సిందిగా లోకేష్‌ కనగరాజ్ అడిగి ఉంటాడని, శివ కార్తికేయన్‌ గ్రీన్‌ సిగ్నల్‌ ఇచ్చి ఉంటాడని వస్తున్న వార్తలు అన్ని పుకార్లే అని తేలిపోయింది. శివ కార్తికేయన్‌ ఆ మధ్య సూపర్ స్టార్ విజయ్ ది గోట్‌ సినిమాలో గెస్ట్ అప్పియరెన్స్ ఇవ్వడం వల్ల కూడా సినిమా పై ఆసక్తి పెరిగింది. ఇప్పుడు కూలీ సినిమాలో ఆయన లేక పోవడంతో ఫ్యాన్స్‌ తో పాటు కొందరు అసంతృప్తి వ్యక్తం చేస్తున్నారు. కూలీ సినిమాలో రజనీకాంత్ కి జోడీగా శృతి హాసన్‌ నటిస్తున్న విషయం తెల్సిందే.