'పుష్ప 2'లో కట్టప్ప అతనేనా?

'పుష్ప అంటే నేషనల్‌ అనుకుంటిరా.. ఇంటర్నేషనలు' 'పుష్ప అంటే ఫ్లవర్‌ అనుకుంటివా.. వైల్డ్‌ ఫైరు'.. ఇప్పుడు ఎక్కడ చూసిన ఈ డైలాగ్సే వినిపిస్తున్నాయి. ఐకాన్ స్టార్ అల్లు అర్జున్ హీరోగా నటిస్తున్న ''పుష్ప 2: ది రూల్'' సినిమాలోని పవర్ ఫుల్ డైలాగ్స్ ఇవి. అందరూ ఊహించినట్లుగానే 'పుష్ప' సెకండ్ పార్ట్ ట్రైలర్ వైల్డ్ ఫైర్ లా పేలిపోయింది. పార్ట్-1 కంటే గ్రాండియర్ గా, భారీ కాన్వాస్ లో చూపించారు. మొదటి భాగంలో లేని కొత్త పాత్రలు ట్రైలర్ లో కనిపించాయి. వాటిల్లో అర గుండుతో ఉన్న వ్యక్తి అందరి దృష్టిని ఆకర్షించాడు.

'పుష్ప 2' ట్రైలర్ లో అర గుండుతో, చెవులకు కమ్మలు, ముక్కుకు ముక్కెర ధరించి, మెడలో చెప్పుల దండ వేసుకొని వింతగా నవ్వుతూ కనిపించిన నటుడు ఎవరని సోషల్ మీడియాలో నెటిజన్లు ఆరాలు తీస్తున్నారు. అది మరెవరో కాదు.. కన్నడ నటుడు తారక్ పొన్నప్ప. 'కేజీఎఫ్' సినిమాలతో తెలుగు ప్రేక్షకులకు పరిచయమైన తారక్.. పలు తెలుగు చిత్రాల్లో కీలక పాత్రలు పోషించాడు. ఇటీవల 'దేవర 1' చిత్రంలో విలన్ సైఫ్ అలీఖాన్ కొడుకు పాత్రలో నటించి మంచి గుర్తింపు తెచ్చుకున్నాడు. ఇప్పుడు 'పుష్ప 2'లో అలరించడానికి వస్తున్నాడు.

కొన్ని రోజుల క్రితం తారక్ పొన్నప్ప ఓ ఇంటర్వ్యూలో మాట్లాడుతూ.. 'పుష్ప 2లో చాలా కీ రోల్ ప్లే చేశాను. నా క్యారెక్టర్ లో చాలా ట్విస్టులు ఉంటాయి. పుష్పరాజ్ లైఫ్ లో నా పాత్ర చాలా ట్విస్ట్ అండ్ టర్న్స్ తీసుకొస్తుంది అని చెప్పాడు. ఆ రోల్ పాజిటివ్ గా ఉంటుందా? నెగిటివ్ గా ఉంటుందా? అని అడగ్గా.. రెండూ అంటాను. ఎందుకంటే ఆ ట్విస్టు చాలా పాజిటివ్ గా అలానే నెగెటివ్ గా వెళ్తుంది అని నటుడు చెప్పుకొచ్చారు.

'పుష్ప 2: ది రూల్' సినిమాలో పుష్పరాజ్ కు వెన్నుపోటు పొడిచే పాత్ర ఉంటుందని అప్పట్లో రూమర్లు వినిపించాయి. బాహుబలిలో కట్టప్ప మాదిరిగా ఆ పాత్ర ఉండొచ్చని ప్రచారం సాగింది. అయితే ఇప్పుడు తారక్ పొన్నప్ప చెప్పినదాన్ని బట్టి, ట్రైలర్ లో చెప్పుల దండతో ఊరేగించడాన్ని బట్టి చూస్తే.. పుష్పరాజ్ కు నమ్మక ద్రోహం చేసే క్యారక్టర్ ఇదే అయ్యుంటుందని నెటిజన్లు కామెంట్లు చేస్తున్నారు. తారక్ చేసిన రోల్ ఏంటనేది తెలియాలంటే ఇంకొన్నాళ్ళు ఆగాల్సిందే.

'పుష్ప 2' చిత్రంలో పుష్పరాజ్ అనేక మంది శత్రువులను ఎదుర్కోబోతున్నాడని ట్రైలర్ తో క్లారిటీ వచ్చేసింది. మొదటి భాగంలోని మంగళం శ్రీను (సునీల్), దాక్షాయణి (అనసూయ భరద్వాజ్), భన్వర్ సింగ్ షేకావత్ (ఫహాద్ ఫాజిల్) సెకండ్ పార్ట్ లో విలన్లుగా కొనసాగుతున్నారు. శత్రువుకి శత్రువు మిత్రుడు అన్నట్లు వీళ్ళు ముగ్గురూ కలిసిపోతారని ట్రెయిలర్ లో చూపించిన ఓ షాట్ ని బట్టి తెలుస్తుంది.

అలానే పుష్పరాజ్‌ పై పగతో రగిలిపోతున్న జాలిరెడ్డి (డాలీ ధనుంజయ) క్యారెక్టర్‌ కూడా ఉంది. పార్ట్‌-1లో పుష్ప చేతుల్లో దెబ్బలు తిని, ఎప్పటికైనా అంతు చూస్తానని ఛాలెంజ్ చేసిన జాలి రెడ్డి.. ట్రైలర్ లో గన్ గురి పెట్టి కనిపించాడు. ఇక ఇంటర్నేషనల్ లెవెల్ లోనూ పుష్పకు శత్రువులు పుట్టుకొచ్చే అవకాశం ఉందని కథ స్పాన్ చూస్తే అనిపిస్తోంది. మరి వీరందరితో పుష్పరాజ్ ఎలా ఫైట్ చేస్తాడు? డైరెక్టర్ సుకుమార్ ఈ స్టోరీని ఎలా ప్లాన్ చేశాడో చూడాలి. 'పుష్ప 2' చిత్రం డిసెంబరు 5న గ్రాండ్ గా రిలీజ్ కాబోతోంది.