సంక్రాంతి బాక్సాఫీస్​.. ఆ ఒక్క చిత్రానికే థియేటర్లు డౌట్​!

వచ్చే సంక్రాంతి 2024 బాక్సాఫీస్ పోరు రసవత్తరంగా సాగనుందన్న సంగతి తెలిసిందే. ఏకంగా అరడజను సినిమాలు బరిలోకి దిగుతున్నాయి. పైగా అందులో దాదాపు ఐదు చిత్రాలు స్టార్ హీరోలవే కావడం విశేషం. దీంతో ఈ చిత్రాలన్నింటికీ థియేటర్లను ఎలా సర్దుబాటు చేస్తారా అనేది ప్రస్తుతం ఆసక్తికరంగా మారింది. మరీ ముఖ్యంగా వీటిలో ఓ చిత్రం థియేటర్ల సమస్యను ఎక్కువగా ఎదుర్కోనున్నట్లు తెలుస్తోంది.

మహేశ్​ బాబు గుంటూరు కారం, రవితేజ ఈగల్, వెంకటేశ్ సైంధవ్, నాగార్జున నా సామిరంగా, యంగ్ హీరో తేజ సజ్జా హనుమాన్ వచ్చే ముగ్గుల పండక్కు బెర్త్​లను ఖరారు చేసుకోగా.. తాజాగా విజయ్ దేవరకొండ ఫ్యామిలీ స్టార్ చిత్రం కూడా ఈ పతాకాల పండక్కే విడుదల తేదీని కన్ఫామ్ చేసుకున్నట్లు మరోసారి క్లారిటీ ఇచ్చింది.

అయితే ఈ చిత్రాల్లో మహేశ్​ గుంటూరు కారం అన్నింటికన్నా పెద్ద సినిమా. అలానే బాగా బజ్​ ఉన్న చిత్రం కూడా. ఆ తర్వాత సైంధవ్, ఫ్యామిలీ స్టార్​ చిత్రాలు కూడా మంచి అడ్వాంటేజ్​, హైప్​ ఉన్న చిత్రాలే. వీటికి సురేశ్​ బాబు, దిల్ రాజు నిర్మాతలు కావడం వల్ల.. థియేటర్ల సమస్య పెద్దగా ఉండదు.

ఇక రవితేజ ఈగల్​ మొదట్లో సంక్రాంతికి రానున్నట్లు స్పష్టత ఇచ్చినప్పటికీ.. మరోసారి ఏమీ క్లారటీ ఇవ్వలేదు. దీనిపై కాస్త డౌట్​గా ఉంది. ఒకవేళ ఇది పండగ బరిలో దిగినట్టైతే.. ఇక కొత్త చిత్రాలేమీ సంక్రాంతి బెర్త్​ను ఖరారు చేసుకోవడానికి అవకాశం ఉండదు. నాగార్జున నా సామి రంగ చిత్రం.. పండక్కి రావాలా వద్దా అనేది దాని షూటింగ్​పై ఆధారపడి ఉంటుంది. అయినా నాగ్​కు ఈ పండగ సెంటిమెంట్​ కాబట్టి.. దాదాపుగా అప్పుడే వచ్చి పైసా వసూల్ చేయాలని పట్టుదలతో ఉన్నారు.

ఫైనల్​గా మిగిలింది 'హనుమాన్' చిత్రం. మరి స్టార్ హీరోల విపరీతమైన పోటీ మధ్య ఈ సినిమా థియేటర్లను పొందే అవకాశాలు చాలా తక్కువగా ఉన్నాయి. స్క్రీన్లను దక్కించుకోవడమంటే పెద్ద సవాల్ అనే చెప్పాలి. చూడాలి మరి ఈ సినిమా రిలీజ్​ డేట్​ను ఏమైనా మార్చుకుంటుందా లేదా అనేది..