షాక్: పేకాట‌లో పెద్దోడు చిన్నోడు!
శ్రీ‌కాంత్ అడ్డాల తెర‌కెక్కించిన `సీత‌మ్మ వాకిట్లో సిరిమ‌ల్లె చెట్టు` ఎంత పెద్ద విజ‌యం సాధించిందో తెలిసిందే.
శ్రీ‌కాంత్ అడ్డాల తెర‌కెక్కించిన `సీత‌మ్మ వాకిట్లో సిరిమ‌ల్లె చెట్టు` ఎంత పెద్ద విజ‌యం సాధించిందో తెలిసిందే. మాన‌వ సంబంధాలు భావోద్వేగాల నేప‌థ్యంలో ర‌క్తి క‌ట్టించిన చిత్ర‌మిది. గోదారి జిల్లా యాస నేటివిటీ ట‌చ్ తో ఆక‌ట్టుకుంటుంది. ఇందులో పెద్దోడుగా విక్ట‌రీ వెంక‌టేష్, చిన్నోడిగా సూపర్ స్టార్ మహేష్ న‌టించ‌గా, వారికి త‌ల్లిదండ్రులుగా విల‌క్ష‌ణ న‌టుడు ప్ర‌కాష్ రాజ్.. స‌హ‌జ‌న‌టి జ‌య‌సుధ న‌టించారు. ఆ సినిమాలో అన్న‌ద‌మ్ములుగా వెంకీ-మహేష్ మ‌ధ్య కెమిస్ట్రీ అద్భుతంగా వ‌ర్క‌వుటైంది. చిన్నోడా పెద్దోడా అంటూ ఆ ఇద్ద‌రికీ మ‌ధ్య అన్న‌ద‌మ్ముల బంధాన్ని ఎంతో అందంగా హృద్యంగా ఆవిష్క‌రించాడు ద‌ర్శ‌కుడు.
ఇక్క‌డ లేటెస్ట్ స‌న్నివేశం చూస్తుంటే పెద్దోడు చిన్నోడు మ‌ళ్లీ క‌లిసిన‌ట్టే క‌నిపిస్తోంది. క‌ల‌వ‌డ‌మే కాదు.. ఇద్ద‌రూ ఓచోట కూచుని ముక్కేసుకున్నారు. పేకాట‌లో త‌ల‌మున‌క‌లుగా క‌నిపిస్తున్నారు. అంతేకాదు.. బెట్టింగ్ కూడా పెద్ద రేంజులోనే న‌డుస్తున్న‌ట్టు క‌నిపిస్తోంది. అక్క‌డ ప‌చ్చ‌నోట్లు ఈ విష‌యాన్ని చెబుతున్నాయి. అదంతా స‌రే కానీ.. మహేష్- వెంకీ ఉన్న‌ట్టుండి అక్క‌డే ఎందుకు క‌లిసారు? అంటే.. అది క్లబ్ హౌస్ ప్రారంభోత్సవం కోసం వెళ్లి కాసేపు స‌ర‌దాగా ఇలా ఆటలో మునిగార‌ని తెలిసింది.
ప్రముఖ పారిశ్రామికవేత్తకు చెందిన క్లబ్ హౌస్ ప్రారంభోత్స‌వానికి హాజ‌రై అనంత‌రం, ఇంట్లో జరిగిన కార్యక్రమానికి ఆ ఇద్ద‌రూ హాజరయ్యారని ఊహాగానాలు సాగుతున్నాయి. లీక్ అయిన ఫోటో ఎక్క‌డినుంచి అన్న‌ది ఇంకా తెలియరాలేదు. అయితే మహేష్ ని ఇలాంటి ఊహించ‌ని చోట చూసి అభిమానులు ఆశ్చ‌ర్య‌పోతున్నారు. దీనిపై ఫ్యాన్స్ స‌ర‌దా వ్యాఖ్యలను షేర్ చేస్తున్నారు. మహేష్ సాధారణంగా రిజర్వ్‌డ్.. అలాంటి కార్యకలాపాలకు దూరంగా ఉంటాడు. కానీ ఇప్పుడు పెద్దోడితో క‌లిసి వచ్చాడంటే అక్క‌డ ఏదో పెద్ద విష‌య‌మే ఉండి తీరాలి.