బిచ్చగాడి రొమాంటిక్ వేశాలు వర్కౌట్‌ అయ్యేనా?

తమిళ హీరో విజయ్ ఆంటోనీ తెలుగు లో బిచ్చగాడు, బిచ్చగాడు 2 సినిమాలతో మంచి పాపులారిటీని సొంతం చేసుకున్నాడు. తెలుగు లో ఆయన నటించిన చాలా సినిమాలు విడుదల అయ్యాయి కానీ బిచ్చగాడు సినిమాలు మాత్రమే మంచి విజయాలను సొంతం చేసుకున్నాయి. తమిళంలో ఆయన చేసిన ప్రతి సినిమాను తెలుగు లో డబ్‌ చేస్తూ వస్తున్నారు.

ప్రస్తుతం రోమియో అనే సినిమాను విజయ్‌ ఆంటోనీ చేస్తున్నాడు. ఇప్పటి వరకు ఈయన చేసిన సినిమాలన్నీ ఒక జోనర్‌ అయితే ఇప్పుడు చేస్తున్న రోమియో సినిమా చాలా విభిన్నమైన సినిమా అంటూ ఆయన సన్నిహితులు చెబుతున్నారు. మొదటి సారి విజయ్ ఆంటోనీ రొమాంటిక్ సినిమా చేస్తున్న నేపథ్యంలో ఆసక్తికర చర్చ జరుగుతోంది.

మృణాళిని రవి హీరోయిన్ గా నటిస్తున్న ఈ రొమాంటిక్ లవ్‌ స్టోరీ సినిమాకు సంబంధించిన స్టిల్స్ అందరి దృష్టిని ఆకర్షిస్తున్నాయి. యాక్షన్ హీరోగా.. సీరియస్ పాత్రలో విజయ్‌ ఆంటోనీని చూసి ఇప్పుడు లవర్ బాయ్ గా ప్రేక్షకులు చూస్తారా... అంగీకరిస్తారా అంటూ పుకార్లు షికార్లు చేస్తున్నాయి.

విజయ్‌ ఆంటోనీ ప్రస్తుతం చేస్తున్న ఈ రోమియో సినిమాను తెలుగు లో 'లవ్‌ గురు' టైటిల్ తో డబ్‌ చేయబోతున్నారు. వచ్చే ఏడాది సమ్మర్ లో విడుదల అయ్యే విధంగా ప్లాన్ చేస్తున్నట్లుగా యూనిట్‌ సభ్యులు అధికారికంగా చెప్పుకొచ్చారు.

ఇక ఎప్పటిలాగే ఈ సినిమాను తన సొంత బ్యానర్ లో విజయ్‌ ఆంటోనీ నిర్మిస్తున్నాడు. అయితే ఈ సినిమా కోసం కొత్త బ్యానర్ ను విజయ్ ఆంటోనీ ప్రారంభించాడు. గుడ్‌ డెవిల్ అనే బ్యానర్ ను ప్రారంభించిన ఈయన ఇకపై విభిన్నమైన సినిమాలను ఈ బ్యానర్‌ లో నిర్మించబోతున్నట్లుగా తెలుస్తోంది.

సలీమ్‌, బిచ్చగాడు, విజయ రాఘవన్‌ వంటి విభిన్నమైన సినిమాలను ప్రేక్షకుల ముందుకు తీసుకు వచ్చిన విజయ్ ఆంటోనీ ఇప్పుడు రోమియోగా వస్తే జనాలు ఆధరిస్తారా అనేది చూడాలి.