ఇద్దరూ ఇద్దరే... ట్రైన్‌ తో దూకుడే

విలక్షణ నటుడు విజయ్‌ సేతుపతి బ్యాక్ టు బ్యాక్ సినిమాలతో బాక్సాఫీస్ వద్ద సందడి చేస్తూనే ఉన్నాడు. ఇటీవలే మహారాజా అనే విభిన్నమైన చిత్రంతో వచ్చిన విజయ్‌ సేతుపతి సంచలన విజయాన్ని సొంతం చేసుకున్నాడు. రూ. వంద కోట్లకు పైగా వసూళ్లు సాధించడంతో పాటు నెట్‌ ఫ్లిక్స్ లో అత్యధిక ప్రేక్షకాధరణ పొందిన ఇండియన్ మూవీగా కూడా నిలిచింది. కేవలం ఇండియాలోనే కాకుండా దాదాపు పాతిక దేశాల్లో ఈ సినిమాకు నెట్‌ ఫ్లిక్స్ ప్లాట్‌ఫామ్ ద్వారా ప్రేక్షకులు బ్రహ్మరథం పట్టారు.

మహారాజా సందడి కొనసాగుతూ ఉండగానే విజయ్ సేతుపతి కొత్త సినిమాకు సిద్ధం అయ్యాడు. ఈ విలక్షణ నటుడు మరో విలక్షణ దర్శకుడు అయిన మిస్కిన్‌ తో సినిమాకు గ్రీన్ సిగ్నల్‌ ఇచ్చాడు. వీరిద్దరి కాంబోలో ట్రైన్ అనే కొత్త సినిమా ప్రారంభం అయ్యింది. మిస్కిన్‌ ఈమధ్య కాలంలో రూపొందించిన ప్రతి సినిమా కూడా మంచి విజయాన్ని సొంతం చేసుకుంది. అంతే కాకుండా విమర్శకుల ప్రశంసలు సైతం అందుకుంది. అందుకే ట్రైన్ సినిమా పై అంచనాలు భారీగా ఉన్నాయి.

తమిళ్‌ లో రూపొందబోతున్న ఈ సినిమాను ఇతర భాషల్లో కూడా డబ్ చేసి భారీ ఎత్తున విడుదల చేయబోతున్నారు. తమిళంలో ఎన్నో విభిన్న చిత్రాలను రూపొందించి, వాటి డబ్బింగ్‌ వర్షన్‌ లతో ఇతర భాషల్లో కూడా మిస్కిన్‌ కి క్రేజ్ దక్కింది. అందుకే మిస్కిన్‌ మరియు విజయ్‌ సేతుపతి కాంబో మూవీ అనగానే అంతా కూడా చాలా ఆసక్తి కనబరుస్తున్నారు. సేతుపతి వంటి విభిన్న నటుడితో మిస్కిన్‌ సినిమా అంటే కచ్చితంగా చాలా విభిన్నంగా ఉంటుంది అనే నమ్మకం ఇప్పటి నుంచే మొదలైంది.

సాధారణంగా మిస్కిన్‌ సినిమాలంటే థ్రిల్లర్‌ ఎలిమెంట్స్ ఎక్కువగా ఉంటాయి. కనుక విజయ్ సేతుపతి తో రూపొందిస్తున్న ట్రైన్ సినిమా కూడా కచ్చితంగా ఒక మంచి థ్రిల్లర్ కాన్సెప్ట్‌ తో రూపొందే అవకాశాలు ఉన్నాయి అంటూ తమిళ్‌ మీడియా లో కథనాలు వస్తున్నాయి. వీరి కాంబో మూవీలో హీరోయిన్‌ గా శృతి హాసన్ నటించబోతున్నట్లుగా తెలుస్తోంది. సినిమా కథ ఎక్కువగా ట్రైన్‌ లో సాగుతుంది కనుక టైటిల్‌ గా ట్రైన్ ను ఎంపిక చేసి ఉంటారు అనే అభిప్రాయం వ్యక్తం అవుతోంది. ఈ సినిమా ఎప్పుడెప్పుడు వస్తుందా అంటూ పాన్ ఇండియా విజయ్ సేతుపతి ఫ్యాన్స్ అప్పుడే ఎదురు చూస్తున్నారు.