రాజాసాబ్.. హైప్ ఎక్కిస్తున్న స్టార్ ప్రొడ్యూసర్!

రెబల్ స్టార్ ప్రభాస్, ఎంటర్టైన్మెంట్ చిత్రాల దర్శకుడు మారుతీ కాంబినేషన్ లో తెరకెక్కుతున్న చిత్రం "ది రాజా సాబ్". పీపుల్ మీడియా ఫ్యాక్టరీ బ్యానర్‌ పై రూపొందుతున్న ఈ పాన్ ఇండియా మూవీ వచ్చే ఏడాది సమ్మర్ లో ప్రేక్షకుల ముందుకు రానుంది. హారర్, కామెడీ ఎలిమెంట్స్ తో రూపొందుతున్న సూపర్ నేచురల్ థ్రిల్లర్. ఇప్పటికే రిలీజైన ఫస్ట్ లుక్, మోషన్ పోస్టర్ కు అనూహ్య స్పందన లభించింది. తాజాగా నిర్మాత టి.జి. విశ్వప్రసాద్ ఈ సినిమా గురించి మాట్లాడారు. వరల్డ్ లో ఇప్పటివరకూ ఏ సినిమాలో చూడని హరర్ ను చూస్తారంటూ హైప్ ఎక్కించారు.

విశ్వప్రసాద్ ఓ ఇంటర్వ్యూలో మాట్లాడుతూ.. "రాజా సాబ్ కు ప్రత్యేకమైన మార్కెటింగ్ ప్లాన్ ఉంది. దాని గురించి ఎక్కువ డిటైల్స్ చెప్పలేను. ఈ సినిమా ఈరోజు స్టార్ట్ అయిన సినిమా కాదు. రెండేళ్ల క్రితమే ప్రారంభమైన చిత్రం. ‘కల్కి’ తర్వాత ఒక పీక్ షెడ్యూల్ ప్లాన్ చేశాం. ఎవరూ ఊహించని పెద్ద స్కేల్ లో తీస్తున్న మూవీ ఇది. స్టోరీ స్పాన్, సెట్స్, వీఎఫ్ఎక్స్ భారీగా ఉంటాయి. వీటన్నిటితో కూడిన కామెడీ ఎంటర్టైనర్ ఇది" అని చెప్పారు.

"ప్రభాస్ ను ఒక డార్లింగ్ లాగా చూస్తారు. అలాగే లార్జర్ దెన్ లైఫ్ క్యారక్టర్ లో హై విజువల్స్ తో చూస్తారు. దానికి మించిన హార్రర్ ఉంటుంది. ఇంతవరకూ ప్రపంచంలో చూపించనంత సైజ్ లో హార్రర్ ఉంటుంది ఈ సినిమాలో. ఇది చిన్న సినిమా కాదు" అని విశ్వప్రసాద్ తెలిపారు. ఇటీవల రిలీజ్ చేసిన ప్రభాస్ లుక్‌కు చాలా మంచి స్పందన వచ్చిందని, మోషన్ పోస్టర్ లో చూపించిన దాని కంటే భారీ సెట్ వేశామని నిర్మాత చెప్పారు.

నిజానికి దర్శకుడు మారుతి ఇప్పటిదాకా చిన్న, మీడియం రేంజ్ సినిమాలు మాత్రమే తెరకెక్కించారు. ప్రభాస్ మాత్రం అన్నీ పాన్ ఇండియా సినిమాలే చేస్తూ వస్తున్నారు. భారీ బడ్జెట్ చిత్రాల మధ్యలో మీడియం రేంజ్ లో ఒక మూవీ కమిటైనట్లుగా ఫ్యాన్స్ భావించారు. వీలు కుదిరినప్పుడు డేట్లు ఇస్తూ, ప్రాజెక్ట్ కంప్లీట్ చేస్తాడని అనుకున్నారు. కానీ ఇది చిన్న సినిమా కాదని, మారుతీ ఏదో గట్టిగానే ప్లాన్ చేస్తున్నట్లు అర్థమవుతోంది. ఎవ్వరూ ఊహించని హ్యూజ్ స్కేల్ లో తీస్తున్న భారీ చిత్రమని నిర్మాత మాటలతో క్లారిటీ వచ్చేసింది.

'ది రాజాసాబ్' సినిమాలో ప్రభాస్ రెండు భిన్నమైన పాత్రల్లో డిఫరెంట్ లుక్స్ లో కనిపించనున్నారు. మాళవిక మోహనన్, నిధి అగర్వాల్, రిద్ది కుమార్ హీరోయిన్లుగా నటిస్తున్న ఈ సినిమాలో, బాలీవుడ్ సీనియర్ స్టార్ హీరో సంజయ్ దత్ కీలక పాత్రలో నటిస్తున్నారు. ఎస్. థమన్ సంగీతం సమకూరుస్తున్నారు. 2025 ఏప్రిల్ 10న తెలుగు, హిందీ, తమిళం, మళయాలం, కన్నడ భాషల్లో ఈ సినిమా విడుదల కానుంది.