ఇంటింటికి తిరిగి పెర్ఫ్యూమ్‌లు అమ్మిన స్టార్ హీరో
చాలా మంది ప్ర‌ముఖుల ఆరంభ జీవితం, సంపాద‌న గురించి తెలిస్తే ఆశ్చ‌ర్యపోకుండా ఉండ‌లేం.
చాలా మంది ప్ర‌ముఖుల ఆరంభ జీవితం, సంపాద‌న గురించి తెలిస్తే ఆశ్చ‌ర్యపోకుండా ఉండ‌లేం. భారీ సెట్ల కోసం కోట్లాది రూపాయ‌లు ఖ‌ర్చు చేయించే క‌ళాత్మ‌క ద‌ర్శ‌కుడు ఒక స్ల‌మ్‌లో ప్ర‌భుత్వం క‌ట్టించిన ప‌క్కా ఇంటిలో కుటుంబంతో నివాసం ఉన్నాడంటే న‌మ్మ‌గ‌ల‌మా? కానీ అదే నా అస‌లు జీవితం అని ఓపెన‌య్యాడు సంజ‌య్ లీలా భ‌న్సాలీ. ఈరోజు వంద‌ల కోట్లు సంపాదించిన క‌ళాత్మ‌క ద‌ర్శ‌కుడు అతడు. ఆస్తులు అంత‌స్తులు కోల్పోయిన అమితాబ్ బ‌చ్చ‌న్, జాకీ ష్రాఫ్ లాంటి వాళ్లు ఆ త‌ర్వాత ఎలాగోలా శ్ర‌మించి, కొత్త‌గా ఆలోచించి పుంజుకున్నారు.
ఇక మరో బాలీవుడ్ స్టార్ హీరో వివేక్ ఒబెరాయ్ తన జీవితంలో అన్నిటినీ చూసాడు. తన వ్యక్తిగత జీవితం, నటనా జీవితం రెండింటిలోని హెచ్చు తగ్గులను అనుభ‌వించాడు. వాటి గురించి అతడు బహిరంగంగా చర్చిస్తాడు. ఇటీవల తన ప్రారంభ వ్యవస్థాపక రోజుల గురించి ఒబెరాయ్ గుర్తు చేసుకున్నాడు. అతడు పాఠశాల విద్యార్థిగా ఉన్నప్పుడు ఇంటింటికీ వెళ్లి పెర్ఫ్యూమ్‌లను ఎలా విక్రయించాడో గుర్తు చేసుకున్నాడు. మా నాన్న నన్ను సంప్రదించినప్పుడు నాకు దాదాపు 10 సంవత్సరాలు. మ‌న‌మంతా ఒక నెలలో వెకేష‌న్‌కి వెళ‌దామ‌ని నాన్న చెప్పాడు. కానీ దానికి ముందు మొదటి నాలుగు వారాల్లో నాకు ఏదైనా నేర్పించేవాడు! నేను తప్పులు చేసాను కానీ చాలా నేర్చుకున్నాను అని వివేక్ ఒబెరాయ్ గుర్తు చేసుకున్నాడు.
తాజా ఇంటర్వ్యూలో చిన్న వయస్సులోనే నేను వ్యాపారిని కావాల‌నే ఆలోచనను కలిగించినందుకు తన తండ్రి సురేష్ ఒబెరాయ్ కి ధ‌న్య‌వాదాలు తెలిపాడు. కేవలం పది సంవత్సరాల వయస్సులో వివేక్ తన తండ్రి కొనుగోలు చేసిన పెర్ఫ్యూమ్ ఇన్వెంటరీని ట్రాక్ చేయడం.. వాటిని లాభం కోసం విక్రయించడం నేర్చుకున్నాడు. ఆ వ‌య‌సులోనే వ్యాపారం, అకౌంటింగ్, అమ్మకాల గురించి ముఖ్యమైన పాఠాలను బోధిస్తూ నిర్ణీత ధర కంటే ఎక్కువకు అమ్మడం.. ఏదైనా అదనపు ఆదాయాన్ని పెంచుకోవ‌డం నేర్పించాడు. నేను నా సైకిల్‌పై ఇంటింటికీ వెళ్ళాను.. నా పాఠశాల బ్యాగ్‌ని ఇన్వెంటరీ సరుకులతో నింపాను! అని వివేక్ గుర్తుచేసుకున్నాడు. తప్పులు చేసినా కానీ, నేర్చుకునేందుకు అవకాశాలను అందించిన విష‌యాన్ని గుర్తుచేసుకున్నాడు. అతడు ప్ర‌తియేటా ఈ త‌ర‌హా వ్యాపార కార్యకలాపాలను కొనసాగించాడు. వ్యాపార ప్రపంచంపై తన అవగాహనను పెంచుకున్నాడు.
15 సంవత్సరాల వయస్సులో వివేక్ అప్పటికే తన సొంత వ్యాపార ఆలోచనలతో ఎద‌గ‌డం ప్రారంభించాడు. స్టాక్ మార్కెట్‌లోకి ప్రవేశించాడు. 19 ఏళ్ళ వయసులో అతడు తన మొదటి టెక్ స్టార్టప్‌ని ప్రారంభించాడు. అతడు 22 ఏళ్లు వచ్చే సమయానికి దానిని విజయవంతంగా విక్రయించాడు. ఈ కీలక ఘట్టం గురించి ఆలోచిస్తూ అతడు ఇలా అన్నాడు. ఒక కంపెనీని స్థాపించడం, దానిని ఎంఎన్‌సికి విక్రయించడం.. సహాయం చేయడం సాధ్యమని నేను గ్రహించాను. పెట్టుబడిదారులతో పాటు నేను డబ్బు సంపాదించాను అని గుర్తు చేసుకున్నారు.
ఈ విజయం వ్యవస్థాపకుడిగా తన సామర్థ్యం ఎలాంటిదో తన కళ్లను తెరిపించింద‌ని.. లాభాల కోసం వ్యాపారాన్ని ఎలా సృష్టించాలో, పెంచుకోవాలో, ఎలా విక్రయించాలో నేర్పించిందని వివేక్ వివరించారు. ఈ జ్ఞానం తరువాత అతడి నటనా జీవితంలో సవాళ్లను అధిగమించడానికి స‌హ‌క‌రించింది. సినిమా వెలుపల కొత్త అవకాశాలను అన్వేషించ‌గ‌ల‌మ‌నే న‌మ్మ‌కాన్ని అతడికి అందించింది. ఈ దశ అతడి జీవితంలో ఒక ప్రధాన మలుపు. వ్యాపారం నుండి నటన వరకు ప్రతిదానికీ అతడు త‌న‌దైన విధానాన్ని రూపొందించాడు.
వివేక్ హార్డ్ వర్క్ ప్రాముఖ్యతను కూడా నొక్కి చెప్పాడు. నా వైపు నుండి హార్డ్ వర్క్ లో పొరపాటు ఉండకూడదు. మనం ఏం చేసినా వంద శాతం ఇవ్వాలి. మనం అలా చేసినప్పుడు ఫలితం ఎక్కువగా ఉంటుంది. అది సినిమాలు, వ్యాపారం, దాతృత్వం లేదా ప్రేమ దేనిలో అయినా ఒక‌టే. కొన్నిసార్లు పనిభారం వల్ల అలసిపోతాం. కానీ టీమ్ అందులోని వ్యక్తులు చాలా మంచిగా ఉన్నప్పుడు వారు స‌హ‌క‌రిస్తారు. మ‌న దృష్టిని, ఆలోచనను అర్థం చేసుకుంటారు... అని తెలిపారు. వివేక్ ఒబెరాయ్ తెలుగులో ర‌క్త చ‌రిత్ర2లో ప‌రిటాల ర‌వి పాత్ర‌లో న‌టించాడు. అతడి న‌ట‌న‌కు మంచి ఫాలోయింగ్ ఏర్ప‌డింది. ఒబెరాయ్ అంత‌కుముందు ఐశ్వ‌ర్యారాయ్ తో ప్రేమాయ‌ణం సాగించ‌డంతో స‌ల్మాన్ ఖాన్ కి విరోధిగా మారాడ‌ని కూడా క‌థ‌నాలొచ్చాయి.