సమంత జాక్‌పాట్ కొడుతుందా?

టాలీవుడ్‌లో సుదీర్ఘ కాలం పాటు స్టార్ హీరోయిన్‌గా ప్రభావాన్ని చూపించిన సమంత.. ఈ మధ్య కాలంలో పాన్ ఇండియా రేంజ్‌లో సత్తా చాటుతోంది. టాలెంటెడ్ లేడీ సమంత రూత్ ప్రభు అందానికి అందం, నటనకు నటనతో మాయ చేస్తోంది. అయితే ఆమె.. 'ఖుషి' తర్వాత మరో సినిమాను చేయలేదు. కానీ, 'ది ఫ్యామిలీ మ్యాన్' దర్శకులు రాజ్ అండ్ డీకే తెరకెక్కిస్తోన్న 'సీటాడెల్: హనీ బన్నీ' వెబ్ సిరీస్‌లోనూ ఫీమేల్ లీడ్‌గా చేస్తోంది.

సమంత రూత్ ప్రభు - వరుణ్ ధావణ్ ప్రధాన పాత్రల్లో ఫుల్ లెంగ్త్ యాక్షన్ ఎంటర్‌టైనర్‌గా రూపొందిన ఈ వెబ్ సిరీస్ పై అంచనాలు గట్టిగానే ఉన్నాయి'. అమెజాన్ ప్రైమ్ వీడియో సంస్థ రూపొందిన ఈ ప్రాజెక్టు టీజర్ ట్రైలర్స్ కు కూడా మంచి స్పందన వచ్చింది. ఈ సిరీస్‌ను రూపొందించేందుకు మేకర్లు ఎక్కువ సమయాన్నే తీసుకున్నారు. అందుకు అనుగుణంగానే సమంత కూడా దీని కోసం చాలా సమయాన్ని కేటాయించింది.

'సీటాడెల్: హనీ బన్నీ' వెబ్ సిరీస్ కోసం సమంత రూత్ ప్రభు చాలానే కష్టపడింది. ముఖ్యంగా ఇందులో తన పాత్ర కోసం ఈ స్టార్ హీరోయిన్ ఎన్నో యాక్షన్ స్టంట్లు చేసింది. ఒకవైపు ఆరోగ్యం సహకరించకపోయినా సమంత మాత్రం రిస్కీ షాట్లలో నటించింది. మొత్తంగా తన కష్టం తెరపై కనిపించేలా ఆమె పెర్ఫార్మెన్స్ పరంగానూ, యాక్షన్ పరంగానూ ఎంతగానో శ్రమించిందని తెలుస్తోంది.

సమంత రూత్ ప్రభు - వరుణ్ ధావన్ కలిసి చేస్తోన్న 'సీటాడెల్: హనీ బన్నీ' వెబ్ సిరీస్‌‌ను నవంబర్ 7వ తేదీ నుంచి అమెజాన్ ప్రైమ్ వీడియో సంస్థ అందుబాటులోకి తీసుకు రాబోతుంది. అంటే ఈ అర్ధరాత్రి నుంచే ఇది స్ట్రీమింగ్ కాబోతుంది. దీంతో ఒక రోజు ముందుగానే హైదరాబాద్‌లో ప్రీమియర్స్ వేశారు. సెలెబ్రిటీలు మాత్రమే దీనికి హాజరయ్యారు. ఈ సిరీస్ చూసిన తర్వాత వాళ్లంతా ఫిదా అయ్యారని తెలిసింది.

'సీటాడెల్: హనీ బన్నీ' వెబ్ సిరీస్ ప్రీమియర్స్ నుంచి లీకైన సమాచారం ప్రకారం.. ఇందులో సమంత రూత్ ప్రభు ప్రాణం పెట్టి నటించినట్లు అభిప్రాయాలు బయటకు వచ్చాయి. ఇదే టాక్ ఆడియెన్స్ నుంచి కూడా వస్తే సమంత వెనక్కి తిరిగి చూసుకునే పని ఉండదు. పైగా ఆమె పాన్ ఇండియా మార్కెట్ ఇంకా బలపడుతుందని చెప్పొచ్చు.

గతంలో వచ్చిన 'ది ఫ్యామిలీ మ్యాన్ 2' వెబ్ సిరీస్‌లో సమంత రూత్ ప్రభు నార్త్‌లోనూ సత్తా చాటింది. ఇప్పుడు 'సీటాడెల్: హనీ బన్నీ' కూడా క్లిక్ అయితే ఆమె జాక్‌పాట్ కొట్టినట్లే అని చెప్పుకోవచ్చు. చూడాలి మరి సమంత కొత్త వెబ్ సిరీస్‌కు ఎలాంటి స్పందన వస్తుందో!