వెయ్యి రోజులైనా ఆగని పిరియడ్స్.. అరుదైన వ్యాధిని గుర్తించిన నెటిజన్లు!

సాధారణంగా మహిళలకు రుతుక్రమం ఒక నిర్దిష్ట సమయంలో వస్తుంది. కానీ ఒక మహిళ మాత్రం ఏకంగా మూడేళ్ల పాటు నిరంతర రక్తస్రావంతో నరకం చూసింది. "జీవితంలో ఒక్కసారైనా ఆ ఎరుపు రంగు లేని రోజు ఉంటుందా?" అని ఆమె వేదన వర్ణనాతీతం. ఎట్టకేలకు సోషల్ మీడియా వేదికగా తన గోడు వెళ్లబోసుకున్న ఆమెకు ఊహించని విధంగా తన సమస్యకు పరిష్కారం లభించింది. ఇంతకీ ఆ వింత వ్యాధి ఏమిటి? ఎలా బయటపడింది? ఆ వివరాలను ఈ కథనంలో తెలుసుకుందాం.

అమెరికాకు చెందిన పాపీ అనే టిక్‌టాక్ యూజర్ తన జీవితంలో ఎదుర్కొన్న అత్యంత బాధాకరమైన అనుభవాన్ని పంచుకున్నారు. ఆమెకు ఏకంగా వెయ్యి రోజులకు పైగా నిరంతరంగా రుతుక్రమం కొనసాగింది. సాధారణంగా మహిళలకు 21 నుంచి 35 రోజుల మధ్యలో 2 నుంచి 7 రోజుల వరకు మాత్రమే రక్తస్రావం ఉంటుంది. కొందరికి జీవనశైలి మార్పులు లేదా ఇతర కారణాల వల్ల అస్తవ్యస్తంగా వచ్చినప్పటికీ, అది మహా అయితే 15 నుంచి 20 రోజులు ఉండొచ్చు. కానీ పాపీ పరిస్థితి మాత్రం అత్యంత అసాధారణంగా మూడేళ్ల రెండు వారాల పాటు కొనసాగింది.

పాపీ తన సమస్యను ఎంతోమంది వైద్యులకు చెప్పినా, అది ఒక మిస్టరీగానే ఉండిపోయింది. వైద్య పరీక్షలు చేసినప్పటికీ, అండాశయంపై తిత్తులు ఉన్నట్లు గుర్తించారు. కానీ దానివల్ల ఇంత తీవ్రమైన రక్తస్రావం జరగదని వైద్యులు తేల్చి చెప్పారు. దీంతో అసలు కారణం ఏమిటనేది వారికి అంతుచిక్కలేదు. ఈ నిరంతర రక్తస్రావం కారణంగా పాపీ శరీరంలో ఐరన్ శాతం బాగా తగ్గిపోయి, తిమ్మిర్లు, కండరాలు, ఎముకల నొప్పితో తీవ్రంగా బాధపడ్డారు.

పాపీకి పీసీఓఎస్ (పాలిసిస్టిక్ ఓవరీ సిండ్రోమ్) ఉందని నిర్ధారణ అయినప్పటికీ, ఇంత సుదీర్ఘ రక్తస్రావానికి అది ప్రధాన కారణం కాదని వైద్యులు భావించారు. అనేక వైద్య పరీక్షలు, చికిత్సలు, మందులు వాడినప్పటికీ ఆమె సమస్య తగ్గలేదు. అల్ట్రాసౌండ్, ఎంఆర్‌ఐ వంటి స్కానింగ్‌లలో కూడా రక్తస్రావానికి కారణం కనిపించలేదు. విసిగిపోయిన పాపీ చివరికి తన టిక్‌టాక్ ఫాలోవర్స్‌ను సహాయం కోరింది. వారి సూచనల ద్వారా తన అరుదైన వ్యాధి గురించి తెలుసుకుని ఆమె ఒక్కసారిగా నివ్వెరపోయింది.

అసలు విషయం ఏమిటంటే... పాపీకి బైకార్న్యుయేట్ గర్భాశయం అనే అరుదైన పరిస్థితి ఉంది. దీనినే గుండె ఆకారపు గర్భాశయం అని కూడా అంటారు. ఈ పరిస్థితిలో గర్భాశయం ఒకే గదిగా ఉండకుండా రెండు వేర్వేరు గదులుగా ఉంటుంది. ఇది చాలా అరుదైన సమస్య, ప్రతి నూటికి ఒకరినో ఇద్దరినో మాత్రమే ప్రభావితం చేస్తుంది. ఈ పరిస్థితి ఉన్న చాలా మంది మహిళలకు ఇలాంటి నిరంతర రక్తస్రావం ఉంటుందా అని పాపీ అడిగిన ప్రశ్నకు, ఒక్కొక్కరిలో ఒక్కో రకమైన లక్షణాలు ఉంటాయని ఒక ఫాలోవర్ వివరించడంతో ఆమె ఊపిరి పీల్చుకుంది.

ఎట్టకేలకు తన మూడేళ్ల నరకానికి కారణం తెలుసుకున్నందుకు పాపీ ఎంతో సంతోషించింది. దాదాపు 950 రోజులు పీరియడ్స్ ప్యాడ్ల కోసం డబ్బులు ఖర్చు చేసి విసిగిపోయిన ఆమె, ఇప్పుడు తన సమస్యకు పరిష్కారం కనుగొనే దిశగా అడుగులు వేస్తోంది. ప్రస్తుతం ఆమె వైద్యులను సంప్రదించి, తన గుండె ఆకారపు గర్భాశయాన్ని సరిచేసే శస్త్రచికిత్స గురించి తెలుసుకుంటోంది. ఒకవేళ ఈ చికిత్స విజయవంతమైతే, ఎరుపు రంగు చూడని స్వర్గం లాంటి రోజులను పొందుతానని ఆమె ఆశాభావం వ్యక్తం చేస్తోంది.