పురంధేశ్వరిని తప్పించేస్తారా...?

బీజేపీ దగ్గుబాటి పురంధేశ్వరిని ఏపీ బీజేపీ ప్రెసిడెంట్ గా ప్రకటించినపుడు చాలా మంది ఆశ్చర్యపోయారు. ఇది ఏ రకమైన డెసిషన్ అయి ఉంటుంది అని కూడా ఆలోచించారు. ఎందుకంటే పురంధేశ్వరి 2014 ఎన్నికల ముందు బీజేపీలో చేరినా టోటల్ బీజేపీ క్యాడర్ తో ఆమె మమేకం అయినది పెద్దగా లేదని అంటారు. ఇక ఆమెకు ఇచ్చిన పార్టీ పదవులు అన్నీ జాతీయ స్థాయిలోనే ఉన్నాయి.

అలాగే ఆమెను ఇతర రాష్ట్రాలలో పార్టీ ఇంచార్జిగా నియమించారు. ఇక ఆమె కేంద్ర మంత్రిగా ఒక పర్యాయం పనిచేశారు. రెండు సార్లు లోక్ సభకు ఎన్నిక అయ్యారు. దాంతో ఏపీ రాజకీయాల పట్ల గ్రౌండ్ లెవెల్ రియాలిటీస్ పట్ల ఆమెకు ఉన్న అవగాహన ఎంతవరకూ అన్నది కూడా కొందరు ఆలోచించారు.

పార్టీని నడపడం అన్నది కష్టమైన బాధ్యత. అందులో సిద్ధాంతబద్ధంగా నడిచే బీజేపీ లాంటి పార్టీకి లీడ్ చేయడం ఇంకా కష్టం. కన్నా లక్ష్మీనారాయణ వంటి వారు మూడు దశాబ్దాలకు పైగా తెలుగు రాజకీయాల్లో ఢక్కామెక్కీలు తిని కూడా బీజేపీ ప్రెసిడెంట్ గా పూర్తి స్థాయిలో నిభాయించలేకపోయారు. ఇక ఆరెస్సెస్ నుంచి బీజేపీలోకి వచ్చి నాలుగు దశాబ్దలా పాటు పార్టీకి సేవ చేస్తూ వచ్చిన సోము వీర్రాజు వల్ల కూడా బీజేపీ ప్రెసిడెంట్ బాధ్యతలు పెద్దగా సాధ్యపడలేదు అంటారు.

బీజేపీ విషయం చూస్తే పొత్తుల పార్టీగా ఉండడం వల్ల వివిధ సందర్భాలలో టీడీపీతో పొత్తు పెట్టుకుని ముందుకు సాగడం వల్ల ఆ పార్టీలో ప్రో బీజేపీ వర్గం ఉంది అని అంటారు. వైసీపీ అధికారంలోకి వచ్చాక ఆ వైపు వారి మీద ఎంతో కొంత అభిమానం చూపే వారూ ఉన్నారని చెబుతారు. వీటికి మించి ఆది నుంచి బీజేపీలో ఉంటూ పార్టీ కోసం ముందుకు సాగే అసలైన క్యాడర్ కూడా ఉంది.

ఇలా వర్గాలను అన్నింటికీ కో ఆర్డినేట్ చేసుకుంటూ పార్టీని ముందుకు నడిపించడం బిగ్ టాస్క్. ఇక పురంధేశ్వరి అయితే ఈ విషయంలో విఫలం అవుతున్నారని అంటున్నారు. ఆమెకు ఏపీ బీజేపీ ప్రెసిడెంట్ పదవి ఎందుకు ఇచ్చారు అన్నది తాను వేరే విధంగా అర్ధం చేసుకుంటున్నారా అన్నది కూడా సందేహంగా ఉంది అంటున్నారు.

సోము వీర్రాజు అంటే యాంటీ టీడీపీ స్టాండ్ అని ముద్ర పడిపోయారు కాబట్టి టీడీపీ ప్రోగా వ్యవహరించాలని ఆమె ఏమైనా ఫిక్స్ అయ్యారా అన్నది కూడా ఆలోచిస్తున్న వారు ఉన్నారు. అయితే బీజేపీ జాతీయ పార్టీ. పొత్తుల విషయం ఎన్నికల వరకూ తేల్చదు. ఈలోగా పార్టీని సొంతంగా బలోపేతం చేయడానికే సారధులను నియమిస్తారు. ఒకవేళ పొత్తులో ఎక్కువ సీట్లు డిమాండ్ చేయడానికైనా పార్టీ బలంగా ఉండాలి కదా అన్న మాట ఉంది.

కానీ పార్టీని బలోపేతం చేసే విషయంలో పురంధేశ్వరి దృష్టి పెట్టడం లేదని అంటున్నారు. ఆమె టీడీపీకి అనుకూలం అన్న ముద్రను చాలా తొందరగానే వేయించుకున్నారని అంటున్నారు. దానికి కారణం ఆమె నందమూరి వారి ఆడపడుచు కావడం అయితే. ఆమె ప్రెసిడెంట్ గా ఉన్న టైంలోనే చంద్రబాబు అరెస్ట్ కావడం మరో పరిణామం. ఇలాంటపుడే బాలన్స్డ్ గా ఉంటూ పార్టీని ముందుకు నడిపించాల్సిన చిన్నమ్మ తడబాటు పడుతున్నారని అంటున్నారు.

ఇక ఆమె ప్రసంగాలు అన్నీ మేధావి వర్గానికి పరిమితం అవుతాయే తప్ప పార్టీ జనాలకు సాదర జనాలకు అట్రాక్ట్ అయ్యేలా లేవు అంటున్నారు. ఈ నేపధ్యలో ఆమె వల్ల ఏమీ ఉపయోగం లేదని పార్టీలో అసలైన బీజేపీ నేతల నోట వస్తోంది. ఇక పురంధేశ్వరి హఠావో అంటూ బీజేపీలో సీనియర్ నేత అయిన ఏవీ సుబ్బారెడ్డి మీడియా సమావేశం పెట్టి మరీ డిమాండ్ చేస్తున్నారు అంటే వ్యవహారం చాలా దూరం వెళ్ళిందని అంటున్నారు.

ఆమె కేవలం తన మరిది గారి కోసమే తాపత్రయపడుతున్నారు టీడీపీ బాగు కోసమే చూస్తున్నారు తప్ప బీజేపీ కోసం కాదనే ఆయన మండిపడ్డారు స్కిల్ స్కాం కేసులో చంద్రబాబు అరెస్ట్ అయితే పురంధేశ్వరి టీడీపీ కంటే పురంధేశ్వరి ఎందుకు ఆత్రపడి ఖండించారని కూడా ఆయన నిలదీస్తున్నారు.

టీడీపీతో పొత్తు పెట్టుకుని ఒక ఎంపీ సీటు తాను గెలిచి కేంద్రంలో మంత్రి కావాలన్న ఆలోచన తప్ప పార్టీని బాగు పరచే ఆలోచన ఆమెకు లేదని సుబ్బారెడ్డి అంటున్నారు. పురంధేశ్వరి రాజకీయ జీవితం అంతా స్వార్ధపూరితమైనదని సుబ్బారెడ్డి విమర్శించారు. పురంధేశ్వరికి కుల పిచ్చి ఉందని కూడా అంటున్నారు. ఆమె నుంచి పార్టీని రక్షించుకోవడానికి తాము ఏమైనా చేస్తామని కూడా చెబుతున్నారు.

మొత్తానికి చూస్తే ఏవీ సుబ్బారెడ్డి బయటకు వచ్చి అంటున్నారు కానీ చాలా మంది బీజేపీ నేతల మనోభావాలు ఇవే అని అంటున్నారు. ఇక కేంద్ర నాయకత్వం కూడా ఆమె పనితీరు పట్ల అసంతృప్తిగా ఉందని అంటున్నారు. ఎన్నికలకు ముందే ఆమెను తప్పించినా తప్పించవచ్చు అని తెలుస్తోంది. ప్రస్తుతం తెలంగాణ ఎన్నికల బిజీలో పార్టీ పెద్దలు ఉన్నారు. అది ముగిశాక ఏపీ తో సహా చాలా చోట్ల పార్టీ ప్రక్షాళన ఉంటుంది అని అంటున్నారు. ఆ విషయం తెలిసే ఏవీ సుబ్బారెడ్డి హఠావో అని పిలుపు ఇస్తున్నారు అని తెలుస్తోంది.