ఇక ఏపీలో బీజేపీ ఒంటరి పోరేనా?

ఆంధ్రప్రదేశ్‌ లో వచ్చే అసెంబ్లీ ఎన్నికలకు ఇంకా మూడు నెలల సమయం మాత్రమే ఉంది. ఈ నేపథ్యంలో అధికార వైసీపీ ఒంటరిగా పోటీ చేస్తోంది. ఇక ప్రతిపక్ష టీడీపీ, జనసేన కలిసి పోటీ చేస్తున్నాయి. మరోవైపు జనసేన, బీజేపీ ఇప్పటివరకు పొత్తులో ఉన్న సంగతి తెలిసిందే. ఇటీవల వరకు బీజేపీ.. తాము జనసేనతోనే పోటీ చేస్తామని, ఆ పార్టీ తమ మిత్ర పక్షమని వెల్లడిస్తూ వస్తోంది.

అయితే.. టీడీపీ.. బీజేపీ విషయంలో ఇంతవరకు సానుకూలత వ్యక్తం చేయలేదు. బహిరంగంగా టీడీపీ నేతలెవరూ బీజేపీ కూడా తమతో పొత్తు పెట్టుకోవాలని ప్రకటనలు చేయలేదు. కేవలం జనసేనాని పవన్‌ కళ్యాణ్‌ మాత్రమే బీజేపీ కూడా తమతో కలిసి పోటీ చేయాలని కోరుకున్నారు. అయితే అవినీతి, కుటుంబ పార్టీలయిన టీడీపీ, వైసీపీలకు తాము వ్యతిరేకమని బీజేపీ గతంలోనే ప్రకటించింది.

ఈ క్రమంలో బీజేపీ రాష్ట్ర అధ్యక్షురాలిగా పురందేశ్వరి బాధ్యతలు చేపట్టాక టీడీపీ, జనసేనలతో కలిసి పోటీ చేయడానికి మొగ్గు చూపుతున్నట్టు వార్తలు వచ్చాయి. అయితే బీజేపీతో పొత్తుకు టీడీపీ సానుకూలత వ్యక్తం చేయకపోవడంతో బీజేపీ ఒంటరి పోరుకే సిద్ధమవుతోందని టాక్‌ నడుస్తోంది. టీడీపీని కాదని బీజేపీతో కలిసి నడవడానికి పవన్‌ కళ్యాణ్‌ కూడా మొగ్గు చూపడం లేదని సమాచారం. ఈ నేపథ్యంలో 2019 ఎన్నికల్లో పోటీ చేసినట్టే బీజేపీ ఒంటరి పోరుకు సిద్ధమవుతుందని చర్చ జరుగుతోంది.

ఈ నేపథ్యంలో రాష్ట్రంలో 175 అసెంబ్లీ, 25 లోక్‌ సభా స్థానాల్లో ఒంటరిగా పోటీ చేయడానికి బీజేపీ నిర్ణయించిందని చెబుతున్నారు. ఈ క్రమంలో పోటీ చే యడానికి ఆసక్తి ఉన్న అభ్యర్థుల బయోడేటాలను కూడా సేకరిస్తోందని తెలుస్తోంది. ఈ మేరకు బీజేపీ జాతీయ నాయకుల నుంచి రాష్ట్ర నాయకులకు ఆదేశాలు వచ్చాయని సమాచారం. దీంతో హుటాహుటిన ఎన్నికల్లో పోటీ చేసే అభ్యర్థుల బయోడేటాలను బీజేపీ రాష్ట్ర నాయకత్వం సేకరిస్తుందని తెలుస్తోంది. ఇందుకోసం జిల్లాకు ముగ్గురు నాయకుల చొప్పున నియమించింది. వారిని ఆయా జిల్లాలకు పంపి అసెంబ్లీ, పార్లమెంటుకు పోటీ చేయాలనుకుంటున్న అభ్యర్థుల వివరాలను సేకరిస్తున్నారు.

ఇటీవల బీజేపీ రాష్ట్ర నాయకులందరూ విజయవాడలో రెండు రోజులపాటు సమావేశాలు నిర్వహించారు. ఇందులో జిల్లా పార్టీ అధ్యక్షులు, పార్టీ రాష్ట్ర కార్యవర్గ సభ్యులు, పార్టీ అనుబంధ విభాగాల నేతలు, మాజీ ఎంపీలు, ఎమ్మెల్సీలు పాల్గొన్నారు. వీరిలో అధిక శాతం మంది టీడీపీ, జనసేనతో పొత్తు పెట్టుకోవాలని సూచించారని టాక్‌. వీరిలో బీజేపీ ఎంపీ సీఎం రమేశ్, మాజీ ఎంపీలు సుజనా చౌదరి, టీజీ వెంకటేశ్‌ ఉన్నారని సమాచారం. అలాగే బీజేపీ రాష్ట్ర అధ్యక్షురాలు పురందేశ్వరి సైతం టీడీపీ, జనసేనలతో పొత్తుకు సిద్ధంగా ఉన్నారని తెలుస్తోంది.

అయితే బీజేపీ అధిష్టానం ఒంటరి పోరుకు మొగ్గు చూపడంతో హడావుడిగా అభ్యర్థుల ఎంపికపై దృష్టి సారించారని టాక్‌ నడుస్తోంది. 175 అసెంబ్లీ, 25 లోక్‌ సభా నియోజకవర్గాల్లో పోటీ చేసేందుకు వీలుగా అభ్యర్థుల జాబితాలను సిద్ధం చేసుకోవాలని అధిష్టానం సూచించినట్టు సమాచారం.