నాకు ఓటు వేయొద్దు... బైడెన్ ను తాకిన డీప్ ఫేక్ సెగ!

ఇటీవల కాలంలో డీప్ ఫేక్ కు సంబంధించిన విషయాలు తీవ్ర వైరల్ అవుతున్న సంగతి తెలిసిందే. ప్రధానంగా సినీతారలు, సెలబ్రెటీలు లక్ష్యంగా భారత్ లో డీప్ ఫేక్క్ వీడియోలు వైరల్ గా మారాయి. ఈ విషయాలపై పలువురు ఆందోళన వ్యక్తం చేశారు. మరోవైపు ప్రభుత్వం ఇలాంటి పనులు చేసేవారిని వెంటాడుతుంది! ఈ క్రమంలో తాజాగా అమెరికానూ డీప్ ఫేక్ సెగ తాకడం ఆసక్తిగా మారగా... వైట్ హౌస్ ఈ విషయంపై ఆందోళన వ్యక్తం చేసింది.

అవును... తాజాగా అగ్రరాజ్యం అమెరికాలో డీప్‌ ఫేక్‌ వ్యవహారం తీవ్ర కలకలం సృష్టిస్తోంది. అమెరికా అధ్యక్షుడు జో బైడెన్, ప్రముఖ గాయని టేలర్‌ స్విఫ్ట్‌ ను సైతం ఈ సమస్య తాకడంతో విషయం చర్చనీయాంశం అయ్యింది. ఇందులో భాగంగా... బైడెన్‌ వాయిస్ అనుకరిస్తూ ముందుగానే రికార్డ్‌ చేసిన ఫోన్‌ కాల్స్‌, గాయనికి చెందిన అభ్యంతరకర దృశ్యాలపై వైట్‌ హౌస్‌ ఆందోళన వ్యక్తం చేసింది.

తాజాగా ఈ విషయాలపై స్పందించిన వైట్‌ హౌస్ ప్రెస్ సెక్రటరీ... తప్పుడు ఫోటోలు, సమాచార వ్యాప్తిపై తీవ్ర ఆందొళన వ్యక్తం చేస్తున్నట్లు తెలిపారు. ఈ సందర్భంగా ఆ సమస్య పరిష్కారానికి చేయగలిగిందంతా చేస్తాం అని వెల్లడించారు. ఈ విషయాలపై స్పందించిన ఆయన... ట్విటర్‌ వంటి సంస్థల్లో నిబంధనలు ఉన్నప్పటికీ.. టేలర్‌ స్విఫ్ట్ కు సంబంధించిన అభ్యంతరకర దృశ్యాలను తొలగించలేకపోయారని అన్నారు.

ఈ డీప్ ఫేక్ లకు సంబంధించిన అంశాలు సుమారు 17 గంటల పాటు నెట్టింట్లో చక్కర్లు కొట్టడంతో 45 మిలియన్లకుపైగా వ్యూస్‌ వచ్చాయని వెల్లడించారు. ఈ సమయంలో... ఈ చిత్రాలపై ఆమె చట్టపరమైన చర్యలు తీసుకోనున్నట్లు తెలుస్తోంది.

కాగా... ఈ ఏడాది చివర్లో జరగనున్న అధ్యక్ష ఎన్నికలకు అభ్యర్థిత్వం కోసం ప్రస్తుతం ప్రైమరీ పోల్స్‌ జరుగుతున్న సంగతి తెలిసిందే. ఈ క్రమంలోనే గత వారం న్యూహాంప్‌ షైర్‌ లో ప్రైమరీ ఎన్నికలు నిర్వహించారు. ఈ సందర్భంగా అక్కడి ఓటర్లకు అధ్యక్షుడు బైడన్‌ చెప్పినట్టుగా ప్రీ రికార్డెడ్ అయిన కొన్ని ఫోన్‌ కాల్స్ వచ్చాయి. ఈ ఎన్నికల్లో తమకు ఓటు వేయొద్దని ఆయన ఓటర్లను కోరడం వాటి సారాంశం. ఇలా బైడెన్ వాయిస్‌ ను అనుకరించడంపై పలువురు ఆందోళన వ్యక్తం చేస్తున్నారు.