సంతకం చేసిన గిటార్ ధర రూ.8.45 లక్షలు... ట్రంప్ కొత్త వ్యాపారం!

ప్రపంచవ్యాప్తంగా తీవ్ర చర్చనీయాంశం అయిన అమెరికా అధ్యక్ష ఎన్నికల్లో రిపబ్లికన్ అభ్యర్థి డొనాల్డ్ ట్రంప్ విజయం సాధించిన సంగతి తెలిసిందే. ఈయన వచ్చే ఏడాది జనవరిలో అమెరికా నూతన అధ్యక్షుడిగా ప్రమాణ స్వీకారం చేయబోతున్నారు. ఈ క్రమంలో ఆయన వ్యాపార సామ్రాజ్యాన్ని విస్తరిస్తున్నారు. ఇందులో భాగంగా గిటార్స్ తెరపైకి తెచ్చారు.

అవును... అమెరికా అధ్యక్ష ఎన్నికల్లో ఘన విజయం సాధించిన డొనాల్డ్ ట్రంప్.. ఈ క్రమంలో తన వ్యాపార సామ్రాజ్యాన్ని విస్తరిస్తున్నారు. ఇందులో భాగంగా... ఎలక్ట్రిక్ గిటార్ ల వ్యాపారాన్ని ప్రారంభించారు. ట్రూత్ సోషల్ మీడియా వేదికగా తన వ్యాపారాన్ని ప్రకటించారు. ఈ సందర్భంగా ధరల విషయంలో ఆసక్తికర ఆలోచన చేశారు!

ఇందులో భాగంగా... మొత్తం 1,300 గిటార్లు విక్రయిస్తున్నట్లు వెబ్ సైట్ లో వెల్లడించగా.. వాటిలో 1,025 గిటార్లు సాధారమైనవని తెలిపారు. ఇక మిగిలిన 275 గిటార్లు చాలా ప్రత్యేకమైనవని చెబుతున్నారు. ఆ ప్రత్యేకతల్లో ఒకటి.. ఆ స్పెషల్ గిటార్స్ పై డొనాల్డ్ ట్రంప్ సంతకం కూడా ఉంటుందంట.

అంతేకాదు... ఈ గిటార్ లను ఎంతో ప్రత్యేకంగా రూపొందించినట్లు తెలుస్తోంది. ముఖ్యంగా గిటార్ లలో అమెరికా జెండా, ఈగల్ బొమ్మలు ప్రత్యేక ఆకర్షణగా నిలుస్తుండగా.. "మేక్ అమెరికా గ్రేట్ ఎగైన్" అని ముత్యాలతో పొదిగిన స్లోగన్ మరో స్పెషల్ అట్రాక్షన్ గా కనిపిస్తుంది. గిటార్ లోని 45వ సంఖ్య నూతన అధ్యక్షుడిగా ఎన్నికైన ట్రంప్ ను సూచిస్తుంది!

ఈ నేపథ్యంలో 1,025 సాధారణ గిటార్ల ధర 1,250 డాలర్ల నుంచి 1,500 డాలర్ల వరకూ విక్రయిస్తుండగా.. స్పెషల్ గా చెబుతున్న 275 గిటార్ల ధర మాత్రం 10వేల డాలర్లుగా చెబుతున్నారు. అంటే... భారత కరెన్సీలో 8.45 లక్షల రూపాయలన్నమాట.