మైనారిటీల విష‌యంలో మాకు-బాబుకు అదే తేడా: జగన్
మంత్రి ప‌ద‌వులు స‌హా అనేక కీల‌క‌మైన బాధ్య‌త‌లు అప్ప‌గించి మైనారిటీల అభివృద్ధికి పాటుప‌డిన‌ట్టు తెలిపారు.
మైనారిటీల విష‌యంలో గత చంద్ర‌బాబు ప్ర‌భుత్వానికి , త‌మ ప్ర‌భుత్వానికి చాలా తేడా ఉంద‌ని సీఎం జగన్ వ్యాఖ్యానించారు. మైనారిటీల అభివృద్దికి తామెంతో కృషి చేశామ‌ని ఆయ‌న వెల్ల‌డించారు. మంత్రి ప‌ద‌వులు స‌హా అనేక కీల‌క‌మైన బాధ్య‌త‌లు అప్ప‌గించి మైనారిటీల అభివృద్ధికి పాటుప‌డిన‌ట్టు తెలిపారు.
‘‘మైనార్టీల అభివృద్ధి కోసం కృషి చేశాం. శాసన మండలి డిప్యూటీ ఛైర్మన్‌గా ముస్లిం మహిళకు అవకాశం కల్పించాం. సాధికారిత అనేది మాటల్లో కాదు.. చేతల్లో చూపించాం. అన్ని రంగాల్లో మైనార్టీల సంక్షేమాని కి ప్రభుత్వం కట్టుబడి ఉంది`` అని సీఎం జగన్ అన్నారు.
మైనార్టీల అభ్యున్నతి కోసం 2019 నుంచి అనేక మార్పులు తీసుకొచ్చామ‌న్నారు. మైనార్టీలకు మంత్రి పదవి ఇచ్చేందుకు గత చంద్ర‌బాబు సర్కారు ఏనాడు చొరవ చూపలేదని విమ‌ర్శించారు. లంచాలు, వివక్షకు తావులేకుండా పాలన కొనసాగిస్తున్నామ‌న్నారు. భిన్నత్వంలో ఏకత్వం అనేదే మన బలమ‌ని, ప్రతి పేదవాడి సంక్షేమం కోసం ఈ ప్రభుత్వం పని చేస్తోందని జగన్ చెప్పారు.
రాష్ట్ర మైనారిటీస్‌ వెల్ఫేర్‌ డే, నేషనల్‌ ఎడ్యుకేషన్‌ డే సందర్భంగా విజ‌య‌వాడ‌లో నిర్వ‌హించిన మౌలానా అబుల్‌ కలాం ఆజాద్‌ జయంతి ఉత్సవాల్లో సీఎం పాల్గొన్నారు. ఈ సందర్భంగా ఆయ‌న మాట్లాడుతూ, మైనార్టీలకు వైఎస్సార్‌సీపీ ప్రభుత్వం పెద్దపీట వేసిందని.. గతానికి, ఇప్పటికి మధ్య తేడాలు గమనించాలన్నారు.
గత ప్రభుత్వంలో మైనార్టీలను టీడీపీ గాలికొదిలేసిందని విమ‌ర్శ‌లు గుప్పించారు. డిప్యూటీ సీఎం హోదాతో మైనార్టీలను ఈ ప్రభుత్వం గౌరవిస్తోందని చెప్పారు. ముస్లింలలో పేదలందరికి త‌న తండ్రి, దివంగ‌త సీఎం వైఎస్సార్‌ రిజర్వేషన్‌లు అమలు చేశారని సీఎం గుర్తు చేశారు. నలుగురు మైనార్టీలను ఎమ్మెల్యేలుగా గెలిపించుకున్నామ‌ని తెలిపారు. గత ప్రభుత్వం మైనారిటీల‌కు ఎలాంటి ప‌ద‌వులు ఇవ్వ‌కుండా అవ‌మాన ప‌రిచింద‌ని వ్యాఖ్యానించారు.