క్రికెట్‌, ఎన్నికలు సినిమాని తొక్కేశాయా?

పండుగ వస్తుంది అంటే చాలు బాక్సాఫీస్ వద్ద పెద్ద హీరోల సందడి ఉంటుంది. సంక్రాంతి, దసరా పండుగలకు ఏ స్థాయిలో సినిమాలు వస్తాయో ప్రత్యేకంగా చెప్పనక్కర్లేదు. ఇతర పండుగలకు కూడా ఒకటి రెండు క్రేజీ సినిమాలు బాక్సాఫీస్ వద్ద సందడి చేయడం పరిపాటిగా వస్తుంది. కానీ ఈసారి దీపావళికి మాత్రం పెద్ద సినిమాలు ఏమీ రావడం లేదని తేలిపోయింది.

వచ్చే వారం లో దీపావళి సందర్భంగా తమిళ్ మరియు హిందీ సినిమా ఇండస్ట్రీ లో హడావిడి ఉండబోతుంది. కానీ తెలుగు సినిమా ఇండస్ట్రీ లో మాత్రం దీపావళి సందడి లేదు. మెగా హీరో వైష్ణవ్‌ తేజ్ సినిమా ఆదికేశవ ని దీపావళి సందర్భంగా తీసుకు రావాలని భావించినా కూడా తాజాగా నిర్మాత మీడియా సమావేశం ఏర్పాటు చేసి మరీ వాయిదా నిర్ణయాన్ని ప్రకటించాడు.

ఒకటి రెండు చిన్నా చితక సినిమా లు రాబోతున్నాయి. కానీ వాటిల్లో ఏ ఒక్కటి క్రేజీ మూవీ లేకపోవడంతో ప్రేక్షకులు లైట్ తీసుకుంటున్నారు. దీపావళికి మూడు నాలుగు డబ్బింగ్ సినిమాలు తెలుగు ప్రేక్షకులకు వినోదాన్ని అందించేందుకు రాబోతున్నాయి. ఆ సినిమాలు ఎంత వరకు సక్సెస్ అవుతాయి అనేది చూడాలి.

దీపావళి రిలీజ్ స్కిప్‌ చేయడానికి ప్రధానంగా రెండు కారణాలుగా తెలుస్తోంది. అందులో ఒకటి క్రికెట్‌ కాగా, మరోటి తెలంగాణ రాష్ట్రంలో జరుగబోతున్న అసెంబ్లీ ఎన్నికలు. సినిమా ఇండస్ట్రీకి అత్యంత కీలకమైన నైజాం ఏరియాలో ఎన్నికల హడావిడి ఉన్న నేపథ్యం లో జనాలు థియేటర్లకు ఏ మేరకు వస్తారు అనేది క్లారిటీ లేదు. అందుకే పెద్ద సినిమాల విడుదల కు ఆసక్తి చూపడం లేదు.

ఇక చాలా ఆసక్తిగా క్రికెట్‌ ప్రపంచ కప్‌ మ్యాచ్ లు జరుగుతున్నాయి. ముఖ్యంగా ఇండియా ఓ రేంజ్ లో విజయాలు దక్కించుకుంటూ ఇప్పటికే సెమీస్ లో అడుగు పెట్టింది. ఒక్క ఓటమి లేకుండా సెమీస్ కు వెళ్లిన జట్టుగా ఇండియా నిలిచింది. సెమీస్ లో మరియు ఫైనల్ లో కూడా ఇండియా ధీటుగా ఆడబోతుంది అంటూ క్రికెట్‌ అభిమానులు భావిస్తున్నారు.

క్రికెట్‌ మ్యాచ్‌ లు ఉన్న సమయంలో సినిమా థియేటర్లలో జనాలు కనిపించరు. అది కచ్చితంగా సినిమాలకు నష్టం కలిగించే విషయం. అందుకే క్రికెట్‌ ప్రపంచ కప్‌ మ్యాచ్ లు పూర్తి అయ్యే వరకు సినిమాల విడుదల వాయిదా వేసుకుంటే బాగుంటుందని కొందరు భావిస్తున్నారు. ఇక అసెంబ్లీ ఎన్నికలు పూర్తి అయిన తర్వాత అంటే క్రిస్మస్‌ కానుకగా ప్రేక్షకుల ముందుకు సినిమాలు వచ్చే అవకాశాలు ఉన్నాయి.