కాంగ్రెస్ నుంచి గద్దర్ త‌న‌యుడు?
పాట‌నే తూటాగా మ‌ల‌చి, అణ‌గారిన వ‌ర్గాల కోసం చివ‌రి శ్వాస వ‌ర‌కూ గ‌ళాన్ని వినిపించిన గద్దర్ మ‌ర‌ణించిన సంగ‌తి తెలిసిందే
పాట‌నే తూటాగా మ‌ల‌చి, అణ‌గారిన వ‌ర్గాల కోసం.. పీడిత ప్ర‌జ‌ల కోసం చివ‌రి శ్వాస వ‌ర‌కూ గ‌ళాన్ని వినిపించిన ప్ర‌జాయుద్ద నౌక గద్దర్ మ‌ర‌ణించిన సంగ‌తి తెలిసిందే. కోట్లాది ప్ర‌జ‌ల గుండెల్లో నిలిచిపోయిన ప్ర‌జా గాయ‌కుడు గద్దర్. తెలంగాణ ప్ర‌త్యేక ఉద్య‌మంలో ఆయ‌న కీల‌క పాత్ర పోషించారు. పాట‌ల‌తో ప్ర‌జ‌ల ర‌క్తాన్ని మ‌రిగించారు. ఉద్య‌మ స్ఫూర్తి ర‌గిలించారు.
రాజ‌కీయాల్లోనూ త‌న‌దైన ముద్ర వేసేందుకు గద్దర్ ప్ర‌య‌త్నించారు. తెలంగాణ ప్ర‌జా ఫంట్ అనే పార్టీని పెట్టారు. అంతే కాకుండా కాంగ్రెస్‌తో స‌న్నిహితంగా మెలిగారు. వ‌చ్చే అసెంబ్లీ ఎన్నిక‌ల్లో ఆయ‌న పోటీ చేయాల‌నుకున్న‌ట్లు తెలిసింది. కానీ ఆ కోరిక తీర‌కుండానే గద్దర్ మ‌ర‌ణించారు. దీంతో ఇప్పుడు గద్దర్ త‌న‌యుడు సూర్య వ‌చ్చే ఎన్నిక‌ల్లో పోటీప‌డే సూచ‌న‌లు క‌నిపిస్తున్నాయి.
గద్దర్ కొడుక్కి సీటు ఇవ్వ‌డంతో పాటు గెలిపించుకోవాల‌నే ప‌ట్టుద‌ల‌తో కాంగ్రెస్ ఉన్న‌ట్లు తెలుస్తోంది. ఇటీవ‌ల ఖ‌మ్మం స‌భ‌లో రాహుల్ గాంధీని గద్దర్ ఆప్యాయంగా ముద్దు పెట్టుకున్న ఫోటో వైర‌ల్ అయిన సంగ‌తి తెలిసిందే. గద్దర్ మ‌ర‌ణంపై రాహుల్ గాంధీ కూడా దిగ్భ్రాంతి వ్య‌క్తం చేశారు. ఈ నేప‌థ్యంలోనే సూర్య‌కు టికెట్ ఇచ్చి.. అసెంబ్లీకి పంపించాల‌నే దృఢ నిశ్చ‌యంతో కాంగ్రెస్ ఉన్న‌ట్లు స‌మాచారం. అయితే ఎక్కడ నుంచి ఆయ‌న్ని నిల‌బెడ‌తార‌న్న దానిపై ఇంకా స్ప‌ష్ట‌త రాలేద‌ని తెలిసింది.