చంద్రయాన్‌-3... మరో విన్యాసాన్ని పూర్తి చేసిన ఇస్రో!
ఇస్రో అత్యంత ప్రతిష్టాత్మకంగా ప్రారంభించిన చంద్రయాన్‌-3 మరో విన్యాసాన్ని పూర్తి చేసుకుంది
చంద్రుడిపై కాలుమోపడమే లక్ష్యంగా రోదసిలో పయనిస్తున్న భారత వ్యోమనౌక చంద్రయాన్‌-3 అనుకున్న లక్ష్యం దిశగా విజయవంతంగా దూసుకెళ్తోంది. ఇందులో భాగంగా ఇప్పటికే జాబిల్లి కక్ష్యలోకి ప్రవేశించింది. దీంతో చంద్రుడి ఉపరితలంపై దిగే చరిత్రాత్మక ఘట్టానికి ఈ వ్యోమనౌక మరింత చేరువైంది. తాజాగా అది జాబిల్లి ఉపరితలానికి మరింత చేరువైంది!
అవును... ఇస్రో అత్యంత ప్రతిష్టాత్మకంగా ప్రారంభించిన చంద్రయాన్‌-3 మరో విన్యాసాన్ని పూర్తి చేసుకుంది. భారత అంతరిక్ష పరిశోధన సంస్థ (ఇస్రో) శాస్త్రవేత్తలు ఆదివారం రాత్రి ఈ వ్యోమనౌకలోని ఇంజిన్‌ ను మండించడం ద్వారా దీని కక్ష్యను మరింత తగ్గించారు. ఫలితంగా అది చంద్రుడి ఉపరితలానికి మరింత చేరువైంది.
ఈ నేపథ్యంలో... మళ్లీ ఇలాంటి విన్యాసాన్ని ఈ నెల 9న మధ్యాహ్నం 1.00 నుంచి 2.00 గంటల మధ్య నిర్వహించనున్నారు ఇస్రో శాస్త్రవేత్తలు. ఆ తర్వాత మరో రెండుసార్లు వీటిని చేపడతారు. ఇలా దశలవారీగా వ్యోమనౌక ఎత్తును తగ్గించి.. అంతిమంగా దాన్ని చంద్రుడి చుట్టూ ఉన్న 100 కిలోమీటర్ల వృత్తాకార కక్ష్యలోకి ప్రవేశపెడతారు. అనంతరం ఈ నెల 23న ఈ వ్యోమనౌకను చంద్రుడిపైన దించుతారు.
కాగా... జూలై 14న ఆంధ్రప్రదేశ్‌ లోని శ్రీహరికోట నుంచి నింగిలోకి పయనమైన చంద్రయాన్‌-3.. వివిధ దశలు ముగించుకొని శనివారం రాత్రి చందమామ కక్ష్యలోకి ప్రవేశించిన సంగతి తెలిసిందే. ఆ తర్వాత అది భూమి చుట్టూ దశలవారీగా కక్ష్యను పెంచుకొని, ఈ నెల 1న చంద్రుడిని చేరే లూనార్‌ ట్రాన్స్‌ ఫర్‌ ట్రాజెక్టరీలోకి ప్రవేశించింది.
ఈ క్రమంలో... అంతా సవ్యంగా ఉందనుకున్నాక ఈ నెల 17న వ్యోమనౌకలోని ఆర్బిటర్‌-రోవర్‌ మాడ్యూల్‌ కు ఆదేశాన్ని పంపుతుంది. ఫలితంగా అది ప్రొపల్షన్‌ మాడ్యూల్‌ నుంచి విడిపోయి, సొంతంగా చందమామను చుట్టేస్తుంది. అనంతరం ఈ నెల 23 సాయంత్రం 5.47గంటలకు ల్యాండర్‌-రోవర్‌ చంద్రుడిపై ల్యాండింగ్‌ కు ఉపక్రమిస్తుంది.