జగన్ కు చెందిన 'సరస్వతీ' ల్యాండ్స్.. ప్రభుత్వం కీలక నిర్ణయం!

మాజీ ముఖ్యమంత్రి, వైసీపీ అధినేత వైఎస్ జగన్ కు చెందిన సరస్వతీ పవర్, ఇండస్ట్రీస్ కోసం కొనుగోలు చేసిన భూముల్లో ప్రభుత్వ, ఎసైన్డ్ భూములు ఉన్నట్లు కథనాలొచ్చిన సంగతి తెలిసిందే. దీనిపై డిప్యూటీ సీఎం పవన్ కల్యాణ్ నేరుగా ఆ భూముల వద్దకు వెళ్లి పరిశీలించారు. ఈ సమయంలో సర్కార్ కీలక నిర్ణయం తీసుకుంది.

అవును... ఏపీ మాజీ సీఎం జగన్ కు చెందిన సరస్వతీ పవర్, ఇండస్ట్రీస్ కోసం కొనుగోలు చేసిన భూముల్లో ఎసైన్డ్ ల్యాండ్స్, గవర్నమెంట్ ల్యాండ్స్ ఉన్నట్లు కథనాలొచ్చిన సంగతి తెలిసిందే. ఈ నేపథ్యంలో ఆ భూముల్లో ఉన్న ఈ ఎసైన్డ్ ల్యాండ్స్ రిజిస్ట్రేషన్లను అధికారులు తాజాగా రద్దు చేశారు. ఈ మేరకు మాచవరం తహసీల్దార్ ఓ ప్రకటన విడుదల చేశారు.

ఇందులో భాగంగా... మాచవరం మండలం వేమవరంలో 20 ఎకరాలు, పిన్నెల్లిలో 4.84 ఎకారాలు ఎసైన్డ్ ల్యాండ్స్ ను తప్పుగా రిజిస్ట్రేషన్ చేశారని.. అందువల్ల ఆ దస్తావేజులను రద్దు చేస్తున్నామని.. అందుకు అనుమతి ఇవ్వాలని కలెక్టర్ కు విన్నవించామని.. ఇదే సమయంలో ఈ భూముల రిజిస్ట్రేషన్ రద్దుకు సబ్ రిజిస్ట్రార్ కు నివేదించినట్లు వెల్లడించారు.

కాగా... వేమవరం, పెన్నెల్లి, చెన్నపాలెం, తంగెడ గ్రామాల్లో మొత్తం 1,250 ఎకరాలను సరస్వతీ పవర్ ప్లాంట్ యాజమాన్యం రైతుల నుంచి కొనుగోలు చేసింది. ఈ సమయంలో.. వాటిలో అటవీ భూములు కూడా ఉన్నయన్న వివాదం తెరపైకి వచ్చింది! దీంతో... డిప్యూటీ సీఎం పవన్ కల్యాణ్ కూడా ఆ ప్రాంతంలో పర్యటించారు.

ఈ సందర్భంగా.. ఈ సరస్వతీ పవర్ కు సంబంధించిన భూములపై లోతుగా దర్యాప్తు చేయాలని అధికారులను ఆదేశించారు. దీంతో.. అధికార యంత్రాంగం మరోసారి సర్వే చేయగా.. ఆ భూముల్లో అటవీ భూములు లేవు కానీ అసైన్డ్ భూములు మాత్రం ఉన్నట్లు తెలిపారు. ఇందులో భాగంగా... వేమవరం, పిన్నెల్లిలో 24.84 ఎకరాలు గుర్తించారు.

దీంతో... ఈ భూముల రిజిస్ట్రేషన్స్ రద్దు కోరుతూ ఉన్నతాధికారులకు నివేదిక ఇచ్చారు. ఈ నేపథ్యంలో.. పల్నాడు జిల్లా కలెక్టర్.. ఆ అసైన్డ్ భూముల రిజిస్ట్రేషన్స్ రద్దు చేయాలని ఆదేశాలు జారీ చేశారు. ఈ అదేశాల మేరకు పిడుగురాళ్ల సబ్ రిజిస్ట్రార్ ఆ అసైన్డ్ ల్యాండ్స్ రిజిస్ట్రేషన్స్ ను రద్దు చేశారు!