బాలకృష్ణ వర్సెస్ జూ. ఎన్టీఆర్... కొడాలి లైన్ లోకి!

తెలుగుదేశం పార్టీ వ్యవస్థాపక అధ్యక్షులు, దివంగత మాజీ ముఖ్యమంత్రి నందమూరి తారక రామారావు 28వ వర్ధంతి సందర్భంగా రెండు తెలుగు రాష్ట్రాల్లోనూ కార్యక్రమాలు ఘనంగా జరుగుతున్నాయి. ఈ సమయంలో హైదరాబాద్‌ లోని ఎన్టీఆర్‌ ఘాట్‌ వద్ద చేసుకున్న ఓ ఘటన ఇప్పుడు సోషల్‌ మీడియాలో వైరల్ గా మారింది. నందమూరి ఫ్యామిలీలో ఉన్న వివాదాలకు ఇది తాజా ఉదాహరణ అనే కామెంట్లకు కారణమైంది. ఈ సమయంలో కొడాలి నాని స్పందించారు.

అవును... ఈ రోజు దివంగత మాజీ ముఖ్యమంత్రి నందమూరి తారక రామారావు 28వ వర్ధంతి సందర్భంగా.. వేకుమ జామునే జూనియర్ ఎన్టీఆర్, తన అన్న కల్యాణ్ రాం తో కలిసి ఘాట్ ని సందర్శించారు. ఈ సందర్భంగా తన తాతకు నివాళులు అర్పించారు.. ఈ సందర్భంగా ఘాట్ వద్దకు జూనియర్ అభిమానులు పెద్ద ఎత్తున చేరుకున్నారు. ఈ సందర్భంగా ఆయనకు అనుకూలంగా నినాదాలు చేశారు.

అయితే జూనియర్ వెళ్లిన అనంతరం అక్కడకు చేరుకున్న బాలకృష్ణ... తారక్ ఫ్లెక్సీలను తొలగించమని ఆదేశించినట్లు తెలుస్తుంది. దీనికి సంబంధించి "ఫ్లెక్సీలను తీసేయ్‌.. ఇప్పుడే" అని చెబుతున్న వీడియోలు వైరల్ గా మారాయి. దీంతో ఈ వ్యవహారంపై జూనియర్ అభిమానులు ఫైరవుతున్నారు. ఇలాంటి చేష్టల వల్ల తారక్ కి వచ్చిన నష్టమేమీ లేదని.. రాబోయే ఎన్నికల్లో తారక్ అభిమానుల సత్తా చూస్తారంటూ నెట్టింట కామెంట్లు పెడుతున్నారు!

ఈ సమయంలో కొడాలి నాని స్పందించారు. తాజాగా గుడివాడలో ఎన్టీఆర్ వర్ధంతి వేడుకలు నిర్వహిస్తున్న నాని మీడియాతో మాట్లాడుతున్న సందర్భంగా ఈ విషయాన్ని ఆయన దృష్టికి తీసుకెళ్లారు మీడియా ప్రతినిధులు. దీంతో సీరియస్ గా రియాక్ట్ అయిన కొడాలి నాని... వెయ్యి మంది బాలయ్యలు, వెయ్యి మంది చంద్రబాబులు వచ్చినా జూనియర్‌ ఎన్టీఆర్‌ వెంట్రుక కూడా పీకలేరు అంటూ ఘాటుగా స్పందించారు.

ఇదే సమయంలో... నాడు చంద్రబాబు కోసం పెద్ద ఎన్టీఆర్ ని దించేశారని, ఇప్పుడు బాలకృష్ణ తన అల్లుడు లోకేష్ కోసం జూనియర్ పై పడుతున్నారని ఫైరయ్యారు! ఇదే క్రమంలో... నాడు ఎన్టీఆర్ పనికి రాడన్న గజ దొంగ చంద్రబాబు అని.. ఆ చంద్రబాబే ఇప్పుడు ఎన్టీఆర్ బూట్లు నాకుతున్నారని కొడాలి నాని దుయ్యబట్టారు! నాడు.. చంపిన వ్యక్తులే నేడు ఎన్టీఆర్‌ ను కీర్తిస్తున్నారని.. ఓట్ల కోసం ఎన్టీఆర్ వర్ధంతి కార్యక్రమాలు చేపడుతున్నారని విమర్శించారు!

కాగా... మాజీ ముఖ్యమంత్రి, తెలుగుదేశం పార్టీ వ్యవస్థాపకులు దివంగత నందమూరి తారకరామారావు వర్ధంతి సందర్భంగా పోటాపోటీ కార్యక్రమాలు గుడివాడలో హాట్ టాపిక్ గా మారిన సంగతి తెలిసిందే. ఇందులో భాగంగా.. గురువారం టీడీపీ నిర్వహించే "రా.. కదలి రా.." బహిరంగ సభలో చంద్రబాబు పాల్గొననున్నారు. మరోవైపు ఎమ్మెల్యే కొడాలి నాని.. ఎన్టీఆర్‌ వర్ధంతి కార్యక్రమాలు పెద్ద ఎత్తున ఏర్పాటు చేశారు. ఈ సందర్భంగా గుడివాడలో గరం గరం వాతావరణం ఏర్పడిందని తెలుస్తుంది!