టీడీపీకి మండించే మండేనా ...కూలింగ్ డేనా ?

ఈ మండే టీడీపీకి చాలా ఇంపార్టెంట్ డేగా చూడాలి. టీడీపీ అధినేత చంద్రబాబు నెల రోజుల పాటు రాజమండ్రి జైలులో ఉంటూ న్యాయ పరమైన ఉపశమనం కోసం ఎదురుచూస్తున్నారు. ఆయన పెట్టుకున్న పిటిషన్లు అన్నీ ఏసీబీ కోర్టు నుంచి హై కోర్టు నుంచి చూస్తే సుప్రీం కోర్టు దాకా ఉన్నాయి. వాటికి సంబంధించిన తీర్పులు మండేనే రానున్నాయి.

దాంతో ఈ మండే ఏమి జరగనుంది అన్నది ఏపీ రాజకీయ వర్గాలతో పాటు తెలుగు రాజకీయాలలోనూ హీటెక్కించే డిస్కషన్ కి దారి తీస్తోంది. చంద్రబాబు కొసం కోటి దేవుళ్ళకు మొక్కుకుంటున్న తెలుగుదేశం పార్టీ ఈ మండే తమకు కూల్ డే అవుతుందని భావిస్తోంది. బాబు కడిగిన ముత్యంలా బయటకు వస్తారని కూడా ఆకాంక్షిస్తోంది.

ఇదిలా ఉంటే ఈ మండే చంద్రబాబు మీద ఏ ఏ కేసులలో తీర్పు వస్తుందో చూద్దాం. ముందుగా ఏసీబీ కోర్టు తీసుకుంటే బాబు బెయిల్ పిటిషన్ దాఖలు చేశారు. సీఐడీ కస్టడీ పిటిషన్ వేసింది. ఈ రెండింటి మీద ఏసీబీ కోర్టు తీర్పు సోమవారం వెలువరించనుంది. ఇక హై కోర్టులో చూసుకుంటే ఇన్నర్ రింగ్ రోడ్, ఫైబర్ నెట్, అంగళ్ళు కేసులలో బాబు ముందస్తు బెయిల్ కోరుతూ పిటిషన్లు దాఖలు చేశారు. వీటి మీద తీర్పు వెలువడనుంది.

అలాగే సుప్రీం కోర్టులో చూసుకుంటే ఏపీ సీఐడీ తన మీద స్కిల్ స్కాం కేసులో పెట్టినది నిరాధారమని, అందువల్ల ఈ కేసుని కొట్టేయాలని కోరుతూ క్వాష్ పిటిషన్ ని బాబు తరఫున న్యాయవాదులు దాఖలు చేశారు. మరి తీర్పు ఎలా వస్తుంది అన్నది చూడాలి.

ఇక ఈ కేసులలో బాబుకు ఏ మేరకు అనుకూలంగా ఉంటుంది అన్నది కనుక చూసుకుంటే ముందుగా సుప్రీం కోర్టులో క్వాష్ పిటిషన్ విచారణ జరుగుతుందా లేక వాయిదా పడుతుందా అన్నది చూడాల్సి ఉంది అంటున్నారు. ఎందుకంటే సీనియర్ లాయర్ ప్రశాంత్ భూషణ్ ఏకంగా సెక్షన్ 17 ఏ అన్నది అవినీతి చేసిన వారికి రక్షణ కవచంగా ఉందని పేర్కొంటూ దాని ఉనికి మీదనే సవాల్ చేస్తూ పిటిషన్ దాఖలు చేశారు. అది నవంబర్ 20న సుప్రీం కోర్టు ముందుకు విచారణకు వస్తుందని అంటున్నారు.

దాంతో ఆ కేసు మీద వచ్చే తీర్పుని బట్టే ఈ కేసుని విచారించాలని ఏపీ సీఐడీ అధికారులు కోరుతారు అన్న ప్రచారం అయితే ఉంది. అది కనుక కాకున్నా మూడు వేల పేజీలు రెండేళ్లకు పైగా దర్యాప్తు చేసిన స్కిల్ స్కాం కేసులో క్వాష్ పిటిషన్ కి అనుకూలంగా తీర్పు వస్తుందా అన్న చర్చ కూడా ఉంది.

హై కోర్టులో ముందస్తు బెయిళ్ళు మూడు కేసుల్లో ఇస్తే బాబు కేవలం స్కిల్ స్కాం కేసులోనే తప్ప మిగిలిన వాటి నుంచి ఇబ్బంది లేకుండా బిగ్ రిలీఫ్ పొందుతారు. అలాగే ఏసీబీ కోర్టు బెయిల్ ఇస్తే నో కస్టడీ అన్నట్లుగా చూడాలి. ఒక వేళ కస్టడీ ఇస్తే బాబు చిక్కుల్లో పడినట్లే. ఇవన్నీ కూడా సుప్రీం కోర్టు క్వాష్ పిటిషన్ మీదనే ఆధారపడి ఉన్నాయని అంటున్నారు. మొత్తానికి చూస్తే టీడీపీని మండించే మండే లేక కూలింగ్ డేనా అన్నది మరి కొద్ది గంటలలో తేలబోతోంది.