తెలంగాణాలో పొలిటికల్ పోలరైజేషన్...జనం మూడ్ ఎటు...?

ఎన్నికలలో సర్వేలు జోస్యాలు ఎపుడూ ఉంటాయి. కానీ వాటిని మించి జనం నాడి కూడా ఇంపార్టెంట్. అది కొన్ని సార్లు పూర్తిగా బయట పడదు, మరి కొన్ని సార్లు మాత్రం బాహాటం అవుతుంది. అపుడు అటు నుంచి ఇటు అంతా దూకేస్తారు. నదులన్నీ సాగరం వైపుగా కదిలినట్లుగా రాజకీయ జనాలు కలసికట్టుగా ఆ వైపుకే క్యూ కడతారు.

ఇపుడు తెలంగాణాలో అదే జరుగుతోందా అన్న చర్చకు తెర లేస్తోంది. పొలిటికల్ పోలరైజేషన్ తెలంగాణాలో జరుగుతోందా అన్నదే అందరిలో చర్చగా ఉంది. తెలంగాణాలో కాంగ్రెస్ గెలుస్తుంది అని సర్వేలు చెబుతున్నాయి. అండర్ కరెంట్ గా కాంగ్రెస్ వేవ్ ఉందని కూడా అంటున్నారు.

దాంతో ఇపుడు కాంగ్రెస్ లోకి వివిధ పార్టీల నేతలు వెళ్తున్నారు. వచ్చే ఎన్నికల్లో గెలుపు గుర్రం కాంగ్రెస్ అవుతుంది అని భావిస్తున్నారు. అందుకే ఆ పార్టీలోకే పరుగులు తీస్తున్నారు. నిజానికి ఆరు నెలల ముందు వరకూ అలాంటి సీన్ కనిపించలేదు. తెలంగాణాలో బీజేపీ ఒక వైపు బస్తీ మే సవాల్ అన్నట్లుగా బరిలో నిలిచింది. కాంగ్రెస్ కొంత తగ్గినట్లుగా ఉంది.

కర్నాటక ఎన్నికల ఫలితాలు అంతా తారుమారు చేశాయి. దాంతో కాంగ్రెస్ లో ఎక్కడ లేని శక్తి వచ్చింది. బీజేపీ గ్రాఫ్ డౌన్ అవుతూ వచ్చింది. ఇక బీజేపీ సంస్థాగతంగా చివరి నిముషంలో చేసిన కొన్ని మార్పులు కూడా ఆ పార్టీని మరింతగా ఇబ్బందుల పాలు చేశాయని అంటున్నారు. ఇంకో వైపు కాంగ్రెస్ పుంజుకోవడం బీయారెస్ కి కూడా బిగ్ ట్రబుల్ గా మారింది.

నిజానికి తెలంగాణాలో ట్రయాంగిల్ ఫైట్ జరుగుతుందని, ప్రభుత్వ వ్యతిరేక ఓట్లు చీలిపోతాయని ఫలితంగా మరోసారి గెలవవచ్చు అన్నది బీయారెస్ ఆలోచనగా ఉంది. కానీ పోలింగ్ కి చాలా కాలం ముందే బీజేపీ నుంచి కీలక నేతలు కాంగ్రెస్ బాట పట్టారు. ఒకప్పుడు బీజేపీలో ప్రముఖంగా వ్యవహరించిన వారు అంతా జనాల మూడ్ చూసి తన దారి తాము చూసుకుంటున్నారు అని అంటున్నారు.

ఇంకో వైపు చూస్తే కాంగ్రెస్ సైతం ఈసారి వచ్చిన వారిని వచ్చినట్లుగా చేర్చేసుకుంటోంది. అలాగే అధికార బీయారెస్ కూడా చేరికలకు గేట్లు తెరచినా కూడా కాంగ్రెస్ వైపే మొగ్గు ఉందని భావించిన వారు ఎక్కువ మంది ఆ పార్టీని ఎంచుకుంటున్నారు. బీజేపీ మీదనే కాంగ్రెస్ ఫోకస్ పెట్టేసింది

బీయారెస్ కాంగ్రెస్ ల మధ్యన హోరా హోరీ పోరుగా మారుతుంది అని అంచనాలు ఉన్న క్రమంలో బీజేపీ ఓట్లను చీల్చకుండా కాంగ్రెస్ వ్యూహ రచన చేస్తోంది అని కూడా అంటున్నారు. బీజేపీలో ఏ మాత్రం పలుకుబడి ఉన్నా వారిని తమ వద్దకు రప్పించుకుంటోంది. అలాగే బీజేపీలో అసంతృప్తిగా ఉన్న వారిని గుర్తించి మరీ ఆపరేషన్ స్టార్ట్ చేశారు అని అంటున్నారు. ఈ పరిణామాల క్రమంలో జరుగుతున్న రాజకీయ పునరేకీకరణ ఎవరికి లాభిస్తుంది అన్నదే చర్చగా ఉంది.

కాంగ్రెస్ గెలుస్తుంది అని సర్వేలు చెబుతున్నాయి. అదే టైం లో బీయారెస్ కి కూడా అనుకూలంగా సర్వే నివేదికలు ఇస్తున్నాయి. అయితే ప్రభుత్వ వ్యతిరేకత ప్రజాభిప్రాయం తమ వైపే ఉందని కాంగ్రెస్ నేతలు చెబుతున్నారు. తెలంగాణా రాజకీయాలలో పునరేకీకరణ జరుగుతోందని ఆ పార్టీ సీనియర్ నేతలు చెప్పడం బట్టి గమనిస్తే ఇంకా చాలా మంది నేతలను టార్గెట్ చేసినట్లే కనిపిస్తోంది. ఇంతకీ జనాల మూడ్ ఎటు వైపు ఉంది అన్నది నవంబర్ 30న తీర్పులోనే వెల్లడి అయ్యే చాన్స్ ఉంది అని అంటున్నారు.