పార్టీకి తలనొప్పిగా మారారా ?

తెలంగాణ బీజేపీలో రాములమ్మ అలియాస్ విజయశాంతి పెద్ద తలనొప్పిగా మారారా ? పార్టీ వర్గాల సమాచారం ప్రకారమైతే అవుననే సమాధానం వినిపిస్తోంది. రాజకీయాల్లోకి వచ్చి ఇన్ని సంవత్సరాలు అవుతున్నా సొంతంగా క్యాడర్ డెవలప్ చేసుకోలేదు. అలాగే సొంతంగా ఒక నియోజకవర్గాన్ని కూడా ఏర్పాటు చేసుకోలేదు. ఎంతసేపు తాను సినీ సెలబ్రిటీనని ఎచ్చులకు పోవటం మాత్రం చాలా ఎక్కువగా ఉందని కమలనాదులే అనుకుంటున్నారు. ఎన్నికలు ఒకవైపు ముంచుకొచ్చేస్తుంటే ఆమెలో అసంతృప్తి కూడా అలాగే పెరిగిపోతోంది.

మనసులో ఏదేదో ఉంచుకుని రెగ్యులర్ గా ట్వీట్లతో జనాలను అయోమయంలో పడేస్తోంది. ఆమె ఉద్దేశ్యంలో పార్టీ నేతలంతా ఆమెకు అగ్రతాంబూలం ఇవ్వాలని. కార్యక్రమం ఏదైనా, సమావేశం ఎక్కడైనా సరే ఆమెకు పిలిచి పెద్దపీట వేయాలని కోరుకుంటున్నారు. అయితే వ్యక్తిగతంగా సినీ సెలబ్రిటీ అనే హోదా తప్ప ఇంకే హోదాలేని విజయశాంతిని తామెందుకు గౌరవించాలన్నది మెజారిటి నేతల వాదన. పార్టీలో పనిచేయరు, పార్టీ కార్యక్రమాలకు హాజరు కారు కానీ అందరు గౌరవం ఇవ్వాలని ఎలా కోరుకుంటారని నేతలు ఎదురు దాడులు చేస్తున్నారు.

ఇపుడు సమస్య ఏమి వచ్చిందంటే రాబోయే ఎన్నికల్లో పోటీ చేయటానికి రాములమ్మకు నియోజకవర్గం లేదు. ఏదో కేసీఆర్ మీద పోటీ చేయటానికి రెడీగా ఉన్నట్లు ప్రకటన ఇచ్చారంతే. కామారెడ్డిలో కానీ గజ్వేలులో కానీ విజయశాంతికి బలం ఏముందని పార్టీ టికెట్ ఇస్తుందో ఎవరికీ అర్ధం కావటం లేదు. ఉదయం నుండి రాత్రివరకు జనాల్లోనే తిరుగుతు నానా అవస్తలుపడుతున్న సీనియర్లకు టికెట్ దక్కటమే అనుమానంగా ఉన్న రోజుల్లో ఇంట్లో నుండి కాలు కూడా బయటకు పెట్టని రాములమ్మకు టికెట్ ఎందుకువ్వాలని నేతలు అడుగుతున్నారు.

ఇదంతా చూస్తుంటే రాములమ్మపై పార్టీ నేతల్లో చాలామందికి బాగా మంటగా ఉన్నట్లు తెలుస్తోంది. తెలంగాణా అధ్యక్షుడు కిషన్ రెడ్డి, ఈటల రాజేందర్ తదితరులు ఎవరూ విజయశాంతిని పెద్దగా పట్టించుకోవటంలేదట. అందుకనే ఆమెకు మండిపోతు ఏదో ఒక ట్వీట్ చేస్తు జనాల్లో నానుతున్నారని అనుకుంటున్నారు. ఎవరో ఏదో అన్నారని కాదుకానీ ఆమెంతట ఆమెగా ఒక్క కార్యక్రమాన్ని కూడా చేపట్టింది లేదు. కేసీయార్ కు వ్యతిరేకంగా విజయశాంతి ఉద్యమాలు చేస్తానంటే ఎవరైనా వద్దంటారా ?