ఏడాదిలో 777 సినిమాలు చూశాడు.. ఆ తర్వాత ఏమైంది?

సినిమాలు చూడ‌టం ఒక క‌ళ‌. అలాంటి క‌ళ‌లో ఆరితేరిపోవ‌డ‌మే కాదు.. అత‌డు ఏకంగా గిన్నిస్ బుక్ రికార్డ్స్ లోకి ఎక్కాడు. ఇంత‌కీ ఎవ‌రు అత‌డు? అంటే.. అమెరికాకు చెందిన 32 ఏళ్ల జకారియా స్వోప్‌కు సినిమాలంటే చాలా ఇష్టం. అందుకే ఆ సినిమాలతో ప్రపంచ రికార్డు సృష్టించాలని నిర్ణయించుకున్నాడు. ఓ వైపు తన పని చేసుకుంటూనే థియేటర్లలో సినిమాలు చూడటం మొదలుపెట్టాడు. ఉదయం 6.45 గంటల నుంచి మధ్యాహ్నం 2.45 గంటల వరకు విధులకు వెళ్లేవాడు. ఆ తర్వాత రోజుకు కనీసం 3 సినిమాలు చూసేవాడు. సెలవుల్లో వాటిని రెట్టింపు చేశాడు. మే 2022 నుండి దీన్ని ప్రారంభించిన స్వోప్ మే 2023 చివరి నాటికి ఏకంగా 777 చిత్రాలను చూశాడు. మొదట `మిలియన్స్: రైజ్ ఆఫ్ గ్రూ` (మినియన్స్: రైజ్ ఆఫ్ గ్రూ) సినిమాతో ప్రారంభించి `ఇండియానా జోన్స్ అండ్ డయల్ ఆఫ్ డెస్టినీ`తో ముగించాడు. దీంతో ఏడాదిలో అత్యధిక సినిమాలను వీక్షించిన వ్యక్తిగా (777 సినిమాల వరల్డ్ రికార్డ్) గిన్నిస్ రికార్డు సాధించాడు. ఫ్రాన్స్ కి చెందిన విన్సెంట్ క్రోస్ సాధించిన 775 సినిమాల రికార్డును ఇప్పుడు స్వోప్ బ్రేక్ చేసాడు.

అయితే ఈ రికార్డు సృష్టించేందుకు స్వోప్ కొన్ని నిబంధనలను కూడా పాటించాడు. అదేంటంటే.. సినిమాలు చూస్తూ వేరే పని చేయకూడదు. అంటే ఫోన్ వైపు చూడటం, నిద్రపోవడం లాంటివి చేయకూడదు. తినడం తాగడం కూడా చేయకూడదు. అతను ఈ నిబంధనలన్నింటినీ పాటించినట్లు ధృవీకరించిన తర్వాత మాత్రమే గిన్నిస్ నిర్వాహకులు జాక్ స్వోప్ పేరును రికార్డులలో నమోదు చేశారు.

మరీ ముఖ్యంగా జాక్ స్వోప్ ఆటిజం గురించి అవగాహన పెంచడానికి ఇలా చేశాడు. `ఆటిజం కారణంగా, నేను గతంలో ఆత్మహత్యకు ప్రయత్నించాను. కానీ అది కరెక్ట్ కాదని తెలిసింది. దాన్నుంచి బయటపడేందుకు సినిమాలు చూసి రికార్డు సాధించాలనుకున్నాను. అందుకే ఇలా చేశాను. భవిష్యత్తులో ఏడాదికి 800 సినిమాలు చూసి నా రికార్డును బద్దలు కొట్టాలనుకుంటున్నా`` అని అన్నారు. ఈ రికార్డును సాధించినందుకు అమెరికన్ ఆత్మహత్య నిరోధక సంస్థ జాక్ స్వోప్‌కు 7,777.77 డాలర్లు (సుమారు రూ. 6 లక్షలు) ప్రదానం చేసింది.