షర్మిల రాజకీయ ప్రస్థానం ఖేల్‌ ఖతమేనా?

తెలంగాణలో అసెంబ్లీ ఎన్నికలకు సర్వం సిద్ధమైన సంగతి తెలిసిందే. నవంబర్‌ 30న తెలంగాణలో ఎన్నికలకు కేంద్ర ఎన్నికల సంఘం నోటిఫికేషన్‌ విడుదల చేసింది. డిసెంబర్‌ 3న ఎన్నికల ఫలితాలు వెలువడనున్నాయి. ఈ నేపథ్యంలో ఇప్పటికే అధికార బీఆర్‌ఎస్‌ అభ్యర్థులను ప్రకటించేసింది. కాంగ్రెస్, బీజేపీ కూడా తమ తొలి విడత అభ్యర్థులను ప్రకటించాయి. రెండో విడత జాబితాల విడుదలకు ఏర్పాట్లు చేసుకుంటున్నాయి.

ఇక తెలంగాణలో రాజన్న రాజ్యం తెస్తానని వైఎస్‌ షర్మిల వైఎస్సార్‌ తెలంగాణ పార్టీని ఏర్పాటు చేసిన సంగతి తెలిసిందే. కాలికి బలపం కట్టుకుని 4 వేల కిలోమీటర్లకు పైగా పాదయాత్ర చేసినా ఒక్కరంటే ఒక్క పేరున్న నేత కూడా పార్టీలో చేరలేదు.

మరోవైపు కాంగ్రెస్‌ పార్టీలో విలీనం చేయడానికి షర్మిల చేసిన ప్రయత్నాలు ఫలించలేదు. తెలంగాణ కాంగ్రెస్‌ లో కీలక నేతలు అడ్డుపుల్ల వేయడంతో షర్మిల పార్టీ విలీనం సాధ్యపడలేదు. ఢిల్లీ వెళ్లి సోనియా గాంధీ, రాహుల్‌ గాంధీలను కలిసి వచ్చినా ప్రయోజనం దక్కలేదు.

దీంతో వైఎస్‌ షర్మిల దాదాపు ఇక ఒంటరి పోరుకే సిద్ధమవుతున్నారు. అయితే ఈసారి షర్మిలతోపాటు ఆమె తల్లి, దివంగత ముఖ్యమంత్రి వైఎస్‌ రాజశేఖరరెడ్డి భార్య వైఎస్‌ విజయమ్మ కూడా పోటీ చేస్తారని టాక్‌ నడుస్తోంది. ఈ విషయాన్ని స్వయంగా షర్మిల సైతం ప్రకటించారు. అవసరమైతే తనతోపాటు వైఎస్‌ విజయమ్మ, అనిల్‌ సైతం పోటీ చేస్తారని ఇప్పటికే చెప్పారు.

కాగా 2009లో వైఎస్సార్‌ మరణించాక పులివెందుల ఉప ఎన్నికలో కాంగ్రెస్‌ పార్టీ తరఫున విజయమ్మ గెలుపొందారు. 2011లో వైఎస్‌ జగన్, వైఎస్‌ విజయమ్మ తమ ఎమ్మెల్యే, ఎంపీ పదవులకు రాజీనామా చేసి వైఎస్సార్‌సీపీని ఏర్పాటు చేశారు. ఆ పార్టీ తరఫున 2012లో కడప ఎంపీ స్థానం నుంచి వైఎస్‌ జగన్, పులివెందుల అసెంబ్లీ స్థానం నుంచి విజయమ్మ పోటీ చేసి ఘనవిజయం సాధించారు.

ఇక 2014లో ఎన్నికల్లో విశాఖపట్నం ఎంపీ స్థానం నుంచి వైసీపీ తరఫున పోటీ చేసిన విజయమ్మ బీజేపీ అభ్యర్థి చేతిలో ఓటమి పాలయ్యారు. ఆ తర్వాత ఇక ఆమె ఎన్నికల్లో పోటీ చేయలేదు. తెలంగాణలో ఆమె కూతురు షర్మిల.. వైఎస్సార్‌ టీపీ పెట్టిన తర్వాత విజయమ్మ వైసీపీ గౌరవాధ్యక్షురాలు పదవికి రాజీనామా చేశారు. అప్పటి నుంచీ విజయలక్ష్మి తెలంగాణలో షర్మిలకు అవసరమైన సహకారం అందిస్తూ వస్తున్నారు.

మరోవైపు వైఎస్‌ షర్మిల ఇంతవరకు ఎన్నికల్లో పోటీ చేయలేదు. వచ్చే అసెంబ్లీ ఎన్నికల్లో తెలంగాణలోని ఖమ్మం జిల్లా పాలేరు నుంచి షర్మిల పోటీ చేస్తారని ఇప్పటిదాకా వార్తలు వచ్చాయి. అయితే పాలేరు నుంచి తన తల్లి విజయమ్మను పోటీ చేయిస్తారని తాజాగా టాక్‌ నడుస్తోంది.

ఇక షర్మిల మిర్యాలగూడ నుంచి పోటీ చేస్తారని చెబుతున్నారు. ఈ మేరకు వైఎస్సార్‌ టీపీ కార్యవర్గ సమావేశంలో ప్రకటిస్తారని అంటున్నారు. పాలేరు, మిర్యాలగూడ సహా మొత్తం 15 నియోజకవర్గాల్లో వైఎస్సార్‌ టీపీ బరిలోకి దిగే అవకాశం ఉందని పేర్కొంటున్నారు.

కాంగ్రెస్‌ తో విలీనం కొలిక్కి రాకపోవడంతో షర్మిల తెలంగాణలో అన్ని స్థానాల్లో పోటీ చేయాలని భావించినట్టు సమాచారం. అయితే అభ్యర్థుల కొరతతో చివరకు 15 నియోజకవర్గాల్లోనే నిర్ణయించినట్టు తెలుస్తోంది. పార్టీ పునరుజ్జీవం కోసం తన తల్లి వైఎస్‌ విజయమ్మను మళ్లీ ఎన్నికల రంగంలోకి దించనున్నట్లు చెబుతున్నారు. ఈ నేపథ్యంలో పాలేరు నుంచి తన తల్లి విజయమ్మను బరిలో దించాలని నిర్ణయించినట్టు తెలుస్తోంది. తాను మిర్యాలగూడ నుంచి పోటీ చేయాలని నిర్ణయించినట్లు సమాచారం. అలాగే మరో 13 అసెంబ్లీ నియోజకవర్గాలకు అభ్యర్థులను ప్రకటించే అవకాశం ఉంది.

అయితే అన్ని పార్టీలు ఇప్పటికే అభ్యర్థుల జాబితాలను ప్రకటించినా వైఎస్సార్‌ టీపీ మాత్రం ఆలూ లేదు.. చూలూ లేదన్నట్టే పరిస్థితి ఉంది. ఇప్పటివరకు ఒక్క అభ్యర్థిని కూడా ప్రకటించలేదు. మేనిఫెస్టో ఊసూ లేదు. మరోవైపు ఏపీలో ఓడిపోయిన విజయమ్మను తెలంగాణలో గెలిపిస్తారని అనుకోవడం కూడా అత్యాశేనని అంటున్నారు. చివరకు షర్మిల అనుకున్న 15 సీట్లలో కూడా పోటీ కష్టమేనని చెబుతున్నారు. ఆమె పోటీ కూడా సందేహాస్పదమేనని పేర్కొంటున్నారు. షర్మిల కూడా పోటీ చేయకపోతే తెలంగాణలో ఆమె రాజకీయ ప్రస్థానం ముగిసినట్టేనని విశ్లేషకులు అభిప్రాయపడుతున్నారు.