అమరావతి చేతిలో క్రికెట్ ఓడిపోయింది

భారతదేశంలో క్రికెట్ అంటే పిచ్చి... ఆరోప్రాణం.. పెళ్లాంబిడ్డలకంటే, తల్లిదండ్రుల కంటే, గర్ల్ ఫ్రెండ్ కంటేకూడా క్రికెట్ కే ప్రాధాన్యమిచ్చేవారున్నారు. ఆంధ్రప్రదేశ్ లోనూ అంతే.. క్రికెట్ మ్యాచ్ ఉందంటే ఎంతదూరమైనా వెళ్తారు చాలామంది.. అలా వెళ్లలేనివారు టీవీలకు అతుక్కుపోతారు. ఆఫీసులకు - వ్యాపారాలకు - కాలేజిలకు డుమ్మా కొడతారు. తిండి, నిద్ర కూడా మర్చిపోతారు. పండుగలు - పబ్బాల రోజున మ్యాచ్ ఉన్నా అదే ధ్యాసలో ఉంటారు. అంత ప్రాధాన్యమున్న క్రికెట్ కు ఈ రోజు ఆంధ్రప్రదేశ్ లో చిన్నబోయింది.. ఇంతవరకూ ఏ కార్యక్రమమూ క్రికెట్ ను బీటవుట్ చేసిన చరిత్ర లేదు.. కానీ, తొలిసారిగా ఆంధ్రప్రదేశ్ శంకుస్థాపన కార్యక్రమం దెబ్బకు ఏపీలోని ఏ టీవీలోనూ క్రికెట్ మ్యాచ్ కనిపించడం లేదు. కుర్రాళ్లు - ముసలాళ్లు - మహిళలు - రైతులు.. ఇలా సకల వర్గాలూ రాజధాని శంకుస్థాపన కార్యక్రమాన్నే చూస్తున్నాయి.

వారం రోజులుగా శంకుస్థాపన కార్యక్రమ ఏర్పాట్లు రాష్ట్రంలో అందరినీ ఆకర్షిస్తున్నాయి. భారీ కార్యక్రమం కావడం.. దానికి సంబంధించి రోజుకో విశేషం తెలుస్తుండడంతో ప్రజల్లో ఈ కార్యక్రమంపై ఆసక్తి ఏర్పడింది. పైగా రాష్ట్రానికి ఇది ఆశాకిరణంగా కనిపిస్తుండడంతో అమరావతి నిర్మాణంపై అందరి చూపు ఉంది. ఈ కారణంగా మొట్టమొదటిసారిగా ఆంధ్రప్రదేశ్ లో ప్రజలు క్రికెట్ మ్యాచ్ ఉందన్న సంగతినీ మర్చిపోయారు.

చెన్నైలో దక్షిణాఫ్రికాతో జరుగుతున్న ఈ నాలుగో వన్డే మ్యాచ్ లో ఎవరు గెలుస్తారన్నది పక్కన పెడితే మ్యాచ్ కు ముందే ఏపీలో అమరావతి చేతిలో క్రికెట్ ఓడిపోయిందన్నది మాత్రం తిరుగులేని సత్యం.