రజనీ ఎంట్రీపై అమిత్ షా మాట ఇది..

తమిళనాడు రాజకీయాలకు సంబంధించి డ్రామా ఇప్పటికైతే ఒక కొలిక్కి వచ్చేసినట్లే. రియల్ హైడ్రామాను గడిచిన తొమ్మిది రోజులుగా చూస్తున్న ప్రజలకు.. అదే పనిగా ఇదే వార్తలు అందించిన మీడియాకు కాస్తంత రెస్ట్ దొరికినట్లే. తమిళరాజకీయాలు ఒక కొలిక్కి వచ్చేసి.. ముఖ్యమంత్రిగా పళనిస్వామి ప్రమాణస్వీకారం పూర్తి అయిన విషయం తెలిసిందే.

తమిళనాడు హైటెన్షన్ వాతావరణం చోటు చేసుకున్నప్పుడు నోరు మెదపని బీజేపీ చీఫ్ అమిత్ షా.. తాజాగా పెదవి విప్పారు. ఒక ఛానల్ తో మాట్లాడిన ఆయన.. తమిళనాడు రాజకీయాలకు.. బీజేపీకి ఏమాత్రం సంబంధం లేదన్న ఆయన.. పన్నీర్ సెల్వం వెనుక తాము లేమని తేల్చి చెప్పారు. అదంతా అన్నాడీఎంకే వ్యవహారంగా ఆయన కొట్టిపారేశారు.

మరి.. తమిళనాడులో పట్టు కోసం సూపర్ స్టార్ రజనీని తీసుకొస్తున్నారా? అన్న ప్రశ్నకు బదులిచ్చిన అమిత్ షా.. ‘‘మీరు.. హెడ్ లైన్ కోసం ప్రయత్నిస్తున్నారు. ఆ ఛాన్స్ మీకు ఇవ్వను. ఏం జరగనుందో చూడండి. వెయిట్ అండ్ వాచ్’’ అంటూ బదులిచ్చారు.హెడ్ లైన్ న్యూస్ ఇవ్వకున్నా.. న్యూస్ ఐటెం అయితే అమిత్ షా ఇచ్చారని చెప్పక తప్పదు.

Like Us on Facebook : https://www.facebook.com/Tupakidotcom/