పీకల్దాకా అప్పుల్లో ఏపీ గవర్నమెంటు

ఆంధ్రప్రదేశ్ ఆర్థిక సంక్షోభంలో చిక్కుకుంది. ఈ 8  నెలల్లోనే ఆర్థిక లోటు రెట్టింపు అయింది. 2016-17 ఆర్థిక సంవత్సరంలో రూ.4-5 వేల కోట్ల వరకు లోటు ఉండొచ్చన్న అంచనాలు తప్పుతున్నాయి. గతనెలాఖరుకే ఇది రూ.9,407 కోట్లకు చేరింది. నోట్ల రద్దు కారణంగా భవిష్యత్తులో ఖజానా ఆదాయం మరింత దిగజారే అవకాశం ఉందని ఆర్థిక శాఖ భయపడుతోంది. అయితే ఖర్చులు ఏమాత్రం తగ్గడం లేదు. మరో నాలుగు నెలలపాటు ఖర్చులకు నిధులు ఎక్కడి నుంచి తేవాలో అర్థంకాని పరిస్థితి నెలకొందని అధికారులు తలలు బద్దలు కొట్టుకుంటున్నారు.
    
ఆదాయాన్ని ఖర్చులు మించిపోతున్నాయి. గత నెలాఖరు నాటికి ఖర్చులు రూ.91,935 కోట్లు అయితే ఖజానా ఆదాయం రూ.రూ.82,428 కోట్లు. ఇందులో ప్రణాళికేతర వ్యయమే రూ.61,252 కోట్లు కావడం గమనార్హం. ఇక కేంద్రం నుంచి వచ్చిన పన్నుల్లో వాటా రూ. 12,296 కోట్లు కాగా గ్రాంట్లు రూ. 14,996కోట్లు. ఏపీ సొంత ఆదాయం రూ. 81,516 కోట్లు. ఖర్చుల విషయానికి వస్తే వేతనాలకు రూ.19,970 కోట్లు వెచ్చిస్తుండగా, సబ్సిడీలు - గ్రాంట్లు - పింఛన్లు - అప్పులపై వడ్డీలు - రుణాలకు వాయిదా చెల్లింపులు - ఇతర ఖర్చులు కింద ప్రణాళికేతర వ్యయం రూ.61,252 కోట్లుగా నమోదైంది.
    
దీంతో పెరుగుతున్న ఆర్థిక లోటును ఎలా అధిగమించాలో తెలియక ఆర్థిక శాఖ కంగారుపడుతోంది. పెరుగుతున్న ఖర్చులను చూసి బెంబేలెత్తిపోవడమే తప్ప ఖర్చులు తగ్గించేందుకు ప్రభుత్వంవైపు నుంచి ఎలాంటి ప్రయత్నం కనిపించడం లేదు. దీంతో రాష్ట్రం ఏమవుతుందో తెలియని పరిస్థితి.


Like Us on Facebook : https://www.facebook.com/Tupakidotcom/