బండి సంజయ్ ఇమేజ్ ఇంతగా ఉందా?

తెలంగాణ బీజేపీ ఫైర్ బ్రాండ్ కమ్ ఎంపీ బండి సంజయ్ ఇమేజ్ రోజురోజుకు పెరుగుతోంది. ఎంత మాటకైనా సిద్ధమన్నట్లుగా ఉండే ఆయన మాటలు తరచూ వివాదాస్పదమవుతాయి. అదే సమయంలో అధికార తెలంగాణ అధినాయకత్వంపై  చేసే విమర్శలు.. ఆరోపణలు ఘాటుగా ఉంటాయి. ఇటీవల కాలంలో బీజేపీ నేతల్లో కనిపించని దూకుడు ఆయనలో ప్రస్ఫుటంగా కనిపిస్తుంది.

దుబ్బాక ఉప ఎన్నికతో ఆయన ఇమేజ్ ఎంతగా పెరిగిందో తెలిసిందే. పార్టీలోనే కాదు ప్రజల్లోనూ ఆయనపై అభిమానం అంతకంతకూ పెరుగుతున్న వైనం కొట్టొచ్చినట్లుగా కనిపిస్తోంది. పార్టీ కార్యకర్తలతో కలిసిపోవటమే కానీ.. తానో జాతీయ పార్టీ రాష్ట్ర అధ్యక్షుడినన్నట్లుగా ఆయన తీరు ఉండదు. సాదాసీదాగా ఉంటూ.. ప్రజల మనసుల్ని కొల్లగొట్టే ఆయనకు హైదరాబాద్ లో ఎంత ఇమేజ్ ఉందన్న విషయం తాజాగా జరిగిన ఒక రోడ్ షో సందర్భంగా బయటకు వచ్చింది.

బీజేపీ జాతీయ అధ్యక్షుడు నడ్డా కొత్తపేట చౌరస్తాలో జరిగిన రోడ్ షోకు హాజరయ్యారు. ఆయన వచ్చే వరకు బండి సంజయ్.. అక్కడి కార్యకర్తలు.. అభిమానుల మధ్యనే ఉన్నారు. రోడ్ షో సందర్భంగా ఏర్పాటు చేసిన ప్రాంతానికి నడ్డా తన ప్రత్యేక ప్రచార రథంపైకి వచ్చారు.

అనంతరం బండి సంజయ్ ను ప్రచార రథంపైకి రావాలని కోరారు. దీంతో.. కార్యకర్తల మధ్య నుంచి ప్రచార రథంపైకి వచ్చిన బండి సంజయ్ ను చూసి.. హాజరైన అభిమానులు.. పార్టీ సానుభూతిపరులు ఈలలు.. చప్పట్లతో పెద్ద ఎత్తున కేకలు.. నినాదాలు చేశారు. దీన్ని చూసిన నడ్డా.. ముసిముసిగా నవ్వుతూ.. బండి భుజాన్ని తట్టటం గమనార్హం. రోజురోజుకు తెలంగాణలో బండి సంజయ్ కు పెరుగుతున్న ఇమేజ్ కు ఇదో నిదర్శనంగా చెప్పక తప్పదు.