ఓవ‌ర్లో 6 బౌండ‌రీలు కొట్టిన బ్యాట్స్ మెన్‌.. అద్దిరిపోయే గిఫ్ట్ ఇచ్చిన బౌల‌ర్‌!

ప్రేక్ష‌కుల దృష్టిలో మైదానంలో సాగేది ఆట‌.. కానీ.. ఆడేవారికి మాత్రం అది యుద్ధం! ఈ స‌మ‌రంలో పైచేయి త‌మ‌దే కావాల‌ని ప్ర‌య‌త్నిస్తుంటారు ప్ర‌త్య‌ర్థులు. ఇందుకోసం స‌ర్వ‌శ‌క్తులూ ఒడ్డుతుంటారు. ఇదే క్రికెట్ లో అయితే.. ప్ర‌తీ బంతి బ్యాట్స్ మెన్ పాలిటి ప్ర‌మాద‌మైతే.. ప్ర‌తీ షాట్ బౌల‌ర్ పాలిటి శ‌రాఘాతం అవుతుంది. ఈ విధంగా బ్యాట్ కు, బంతికి చివ‌రి వ‌ర‌కు జరిగే పోరాటంలో ఎవ‌రో ఒక‌రిది పైచేయి అవుతుంది.

కానీ.. కొన్ని సంద‌ర్భాలుంటాయి. సున్నా ప‌రుగుల‌కే బ్యాట్స్ మెన్ ను పెవిలియ‌న్ కు పంపిన బౌల‌ర్ య‌ముడిగా మారితే.. ఒకే ఓవ‌ర్ లో వ‌రుస బౌండ‌రీల విధ్వంసం సృష్టించి, బౌల‌ర్ ను ఊచ‌కోత కోస్తాడు బ్యాట్స్ మెన్‌. ఎప్పుడో అరుదుగా జ‌రిగే ఈ సంఘ‌ట‌న ఒక‌టి ఇటీవ‌ల న్యూజిలాండ్‌-ఆసీస్ జ‌ట్ల మ‌ధ్య చోటు చేసుకుంది.

టీ20 సిరీస్ కోసం న్యూజిలాండ్ లో ప‌ర్య‌టిస్తోంది ఆస్ట్రేలియా. ఇందులో భాగంగా తాజాగా జ‌రిగిన మూడో మ్యాచ్ లో ఆసీస్ బ్యాట్స్ మెన్ మ్యాక్స్ వెల్ వీరవిహారం చేశాడు. కివీస్ బౌల‌ర్ నీష‌మ్ వేసిన ఒకే ఓవ‌ర్లో.. ఆరు బౌండ‌రీల‌ను సాధించాడు. వరుస‌గా.. ఆరు బంతుల్లో 4,6,4,4,4,6 ప‌రుగులు సాధించాడు గ్లెన్‌.

స‌హ‌జంగా.. ఇలా ఊచ‌కోత కోసిన బ్యాట్స్ మెన్ ను శ‌తృవుగా గుర్తుంచుకుంటాడు బౌల‌ర్‌. కానీ.. నీష‌మ్ మాత్రం ఎవ‌రూ ఊహించ‌ని విధంగా స్పందించాడు. త‌న జెర్సీపై మ్యాక్స్ సాధించిన బౌండ‌రీల లిస్ట్ ను రాసి ప్రేమ‌గా.. మ్యాక్స్ వెల్ కు అందించాడు. హ్యాపీగా స్వీక‌రించిన గ్లెన్‌.. త‌న జెర్సీని నీష‌మ్ కు బ‌హూక‌రించాడు. వీరు సోష‌ల్ మీడియాలో షేర్ చేసిన ఈ ఫొటో తెగ వైర‌ల్ అవుతోంది.