త‌క్కువ టైంలో బీజేపీ సాధించిన గొప్ప రికార్డు!

కేంద్రంలో అధికారంలో ఉన్న‌ భారతీయ జనతాపార్టీ(బీజేపీ) మ‌రో రికార్డు సాధించింది. ఇప్ప‌టికే ప్ర‌పంచంలోనే అత్యధిక స‌భ్యులు క‌లిగి ఉన్న పార్టీగా త‌న ఖాతాలో రికార్డు న‌మోదుచేసుకున్న బీజేపీ....దేశంలోని ఏడు జాతీయ పార్టీల్లో అత్యంత సంపన్న పార్టీగా నిలిచింది. 2015-16 ఆర్థిక సంవత్సరానికి వెల్లడైన వివరాల ప్రకారం.. రూ.894కోట్ల ఆస్తులతో ఆ పార్టీ మొదటిస్థానాన్ని ఆక్రమించింది. రూ.759కోట్లతో కాంగ్రెస్ తర్వాత స్థానంలో నిలిచింది. అదే ఆర్థిక సంవత్సరానికి బీజేపీ రూ. 25కోట్ల ఖర్చుల్ని చూపగా - కాంగ్రెస్ రూ.329 కోట్లు వ్యయం చేసినట్లు తెలిపింది. ఈ వివరాలతో అసోసియేషన్ ఆఫ్ డెమొక్రటిక్ రిఫార్మ్స్ (ఏడీఆర్) మంగళవారం ఓ నివేదికను విడుదల చేసింది.

2004-05 నుంచి 2015-16 మధ్యకాలంలో పార్టీలు వెల్లడించిన వివరాల ఆధారంగా ఈ నివేదిక రూపొందించారు. పార్టీల స్థిర - చరాస్తులు - విరాళాలు - వాహనాలు - పెట్టుబడులు - డిపాజిట్లు - రుణాలన్నీ ఇందులో ఉన్నాయి. ఇందులో అత్యంత ఆస‌క్తిక‌ర‌మైన అంశం...2014-15 వరకు కాంగ్రెస్ బీజేపీకన్నా ఎక్కువ ఆస్తుల్ని కలిగి ఉండగా, 2014లో అధికారంలోకి వచ్చిన బీజేపీ రెండేండ్లలోనే కాంగ్రెస్‌ ను దాటేసింది. పార్టీ ఖర్చులు - ఇతరత్ర వ్యయాలను తీసేస్తే.. 2015-16లో రూ.869కోట్లతో బీజేపీ సంపన్న పార్టీగా నిలిచింది. ఇదే వరుసలో బహుజన్ సమాజ్ పార్టీ (బీఎస్పీ) రూ.557 కోట్లతో - సీపీఎం రూ.432 కోట్లతో తర్వాత స్థానాల్లో నిలిచాయి. 11 ఏండ్లకాలంలో పార్టీ ఫండ్‌ ను బీజేపీ 700శాతం పెంచుకోగా - కాంగ్రెస్ కేవలం 169శాతం వృద్ధిని సాధించింది.

కాగా, పార్టీ నిధిని గణనీయంగా పెంచుకున్న పార్టీల్లో తృణమూల్ కాంగ్రెస్ ముందుంది. 11 ఏళ్ల‌లో ఆ పార్టీ 13,447శాతం వృద్ధిని సాధించింది. బీఎస్పీ పార్టీ నిధి 1,194శాతం పెరిగింది. 2004-05లో ఏడు జాతీయ పార్టీల ఆస్తుల సగటు విలువ రూ 61.62 కోట్లు కాగా - 11 ఏళ్లలో అది రూ388.45 కోట్లకు పెరిగింది.