లేటెస్ట్ ట్రెండ్‌: సిమ్ కొంటే ఉల్లి ఉచితం

డిమాండ్‌ కు త‌గ్గ‌ట్లు వ్యాపారం చేయ‌టం తెలివైనోళ్లు చేసే ప‌ని. అందుకేనేమో.. తాజాగా ఐడియా సెల్యులార్‌ కంపెనీ హైద‌రాబాద్‌ లో చేస్తున్న వినూత్న ప్ర‌చారం అంద‌రిని ఆక‌ట్టుకుంటోంది. కంపెనీ ఇచ్చిన ఐడియానో.. లేక‌.. స్థానికంగా తీసుకున్న నిర్ణ‌య‌మో కానీ.. హైద‌రాబాద్ లోని దిల్‌సుఖ్ న‌గ‌ర్ ప్రాంతంలో ఐడియా సిమ్ కార్డులు కొనుగోలు చేసే వారికి కిలో ఉల్లిపాయ‌లు ఇస్తామంటూ ఊరిస్తున్నారు.

ఉల్లి ధ‌ర‌లు భారీగా పెరిగిన వేళ‌.. వినియోగ‌దారుల్ని ఇట్టే ఆక‌ర్షించాల‌ని అనుకున్నారేమోకానీ.. ఇంత‌కాలం సిమ్‌ కార్డు కొనుగోలు చేస్తే అద‌న‌పు టాక్ టైం ఇస్తామ‌ని.. లేదంటే.. ఉచితంగా సిమ్ కార్డుల పంపిణీ చేసే సంస్థ‌ల‌కు భిన్నంగా.. మార్కెట్ లో ఉల్లి ధ‌ర‌లు ఆకాశాన్ని తాకుతున్న వేళ‌.. త‌మ కంపెనీ సిమ్ కార్డు కొంటే కిలో ఉల్లి ఫ్రీ అంటూ ఊరించ‌టం ప‌లువురి దృష్టిని ఇట్టే ఆక‌ర్షిస్తోంది.