భూమా వారసురాలిగా అఖిల‌ను ప్ర‌క‌టించిన బాబు

నంద్యాల ఎమ్మెల్యే భూమా నాగిరెడ్డి అంత్య‌క్రియల్లో ఆంధ్రప్రదేశ్ ముఖ్యమంత్రి నారా చంద్రబాబునాయుడు పాల్గొన్నారు. ఆళ్లగడ్డ చేరుకున్న బాబు భూమా భౌతిక కాయాన్ని సందర్శించి నివాళులర్పించిన అనంత‌రం భూమా కుటుంబ సభ్యులను పరామర్శించారు. అనంతరం సీఎం చంద్ర‌బాబు మాట్లాడుతూ...ఊహించని ఘటన త‌మ‌ను తీవ్రంగా బాధించిందని అన్నారు. భూమా నాగిరెడ్డి పార్టీ పట్ల విధేయతగా ఉండేవారని, ముఖ్యంగా తనతో  చాలా సన్నిహితంగా ఉండేవారని చంద్రబాబు తెలిపారు. తెలుగుదేశం పార్టీ ఓ కుటుంబ సభ్యున్ని పోగొట్టుకుందన్నారు. భూమా నాగిరెడ్డి మృతి తెలుగుదేశం పార్టీకి, రాష్ట్రానికి తీరని లోటని చంద్రబాబు అన్నారు.

భూమా నాగిరెడ్డి కుటుంబాన్ని అన్ని విధాలుగా ఆదుకుంటామని చంద్రబాబునాయుడు ఈ సంద‌ర్భంగా ప్ర‌క‌టించారు. నంద్యాల అభివృద్ధికి భూమా చేసిన కృషి మరువలేనిదన్నారు. భూమా నాగిరెడ్డి ఆశయాలను అఖిల ప్రియ కొనసాగించాలని చంద్రబాబు అన్నారు. ఇదిలాఉండ‌గా..భూమా నాగిరెడ్డి అంత్యక్రియలు ఆళ్లగడ్డలోని శోభా ఘాట్ లో అధికార లాంఛనాలతో జరిగాయి. రాష్ట్రం నలుమూలల నుంచీ పెద్ద సంఖ్యలో తెలుగుదేశం శ్రేణులు, భూమా అనుచరులు, అభిమానులు వచ్చి తమ ప్రియతమ నేతకు కన్నీటి వీడ్కోలు పలికారు. భూమా కుమరుడు జగత్ విఖ్యాత్ రెడ్డి భూమా చితికి నిప్పంటించారు.  ముఖ్యమంత్రి చంద్రబాబునాయుడు, తెలుగుదేశం జాతీయ ప్రదాన కార్యదర్శి నారా లోకేష్, పలువురు మంత్రులు, ఎమ్మెల్యేలు, తెలుగుదేశం నాయకులు, పెద్ద సంఖ్యలో భూమా అభిమానులు హాజరయ్యారు.

Like Us on Facebook : https://www.facebook.com/Tupakidotcom/