ఏటీఎంకు మాజీ ఎమ్మెల్యే పూజలు

 జనాన్ని అట్రాక్టు చేయడంలో రాజకీయ నాయకులను మించినవారు ఉండరేమో.. సమకాలీన అంశాలపై ఎన్ని సభలు పెట్టినా - ఎన్ని ఉపన్యాసాలు ఇచ్చినా కూడా అవి జనానికి ఎంత చేరువవుతాయో చెప్పలేం కానీ, డిఫరెంటుగా చేపట్టే కార్యక్రమాలు మాత్రం బాగా రీచవుతాయి. అందులోనూ పదవులు - అధికారంలో లేని నాయకులకు ఇలాంటి అవుటాఫ్ బాక్సు అయిడియాలు చాలా అవసరం. ఎల్బీ నగర్ మాజీ ఎమ్మెల్యే సుధీర్ రెడ్డి కూడా అదే సూత్రం ఫాలో అవుతున్నారు. ఇండియాలో డబ్బు కష్టాలను ఫోకస్ చేస్తూ ఆయన ఏటీఎం వద్ద నిరసన తెలపడమే కాకుండా పని చేయని ఏటీఎంకు పూలమాల వేసి పూజలు చేసి నిరసన తెలిపారు.

ముందు జాగ్రత్తలు తీసుకోకుండా కేంద్రప్రభుత్వం పెద్దనోట్లను రద్దు చేస్తూ తీసుకున్న నిర్ణయంతో ప్రజ‌లు ఎన్నో ఇబ్బందులు ప‌డుతున్నార‌ని సుధీర్ రెడ్డి అన్నారు. గొప్పల‌కు పోతూ ఎవరూ చేయని పనిని తాము చేశామని చాటిచెప్పుకోవ‌డానికి మాత్రమే ప్రధానమంత్రి న‌రేంద్ర మోదీ పెద్దనోట్ల‌ను ర‌ద్దు చేశారని ఆయన ఆరోపించారు.

చిల్లర నోట్లు దొర‌క్క ప్రజ‌లు నిత్యావసర స‌రుకులు కూడా కొనుక్కోలేని స్థితిలో క‌ష్టాలు ప‌డుతున్నార‌ని సుధీర్ రెడ్డి విమ‌ర్శించారు. ఏటీఎం ముందు కొబ్బరి కాయ కొట్టి - అగరుబత్తీలు వెలిగించి పూజలు చేసి ఈ కష్టాలు తీరాలంటూ మొక్కకున్నారు.  మొత్తానికి చాలాకాలంగా కనిపించని మాజీ ఎమ్మెల్యే మళ్లీ యాక్టివేట్ అవుతున్నట్లుగా ఉంది.

Like Us on Facebook : https://www.facebook.com/Tupakidotcom/