ఆ ఎంపీ పెద్ద సాహసమే చేశారుగా?

ఎంతో ఫ్యాషన్ లేదంటే కమిట్ మెంట్.. అంతకు మించిన మరేదైనా ఉంటే తప్పించి చేయలేని సాహసాలు కొన్ని ఉంటాయి. అలాంటి వాటిని అందరూ చేయటం అంత తేలికైన విషయం కాదు. అందునా రాజకీయాల్లో ఉండే వారికి చాలా కష్టం. అయితే.. అందుకు భిన్నంగా వ్యవహరించిన అందరి చూపు తన మీద పడేలా చేశారు కర్ణాటక రాష్ట్రానికి చెందిన ఒక యువ ఎంపీ. ప్రస్తుతం బెంగళూరులో భారత వాయుసేన శక్తి సామర్థ్యాల్ని చాటి చెప్పే ఏరో ఇండియా ప్రదర్శన సాగుతోంది.

యలహంక వేదికగా సాగుతున్న ఈ షోలో ప్రత్యేక ఆకర్షణగా మారారు సౌత్ బెంగళూరు నియోజకవర్గ ఎంపీ తేజస్వీ సూర్య. ఈ యువ బీజేపీ ఎంపీ తాజాగా ఫ్లయింగ్ సూట్ ధరించి తేజస్ లో విహరించారు. దీనికి సంబంధించిన ఫోటోల్ని తాజాగా ఆయన తన సోషల్ మీడియా ఖాతాలో షేర్ చేశారు. ఇలాంటి సాహసాలు చేయటానికి అంతో ఇంతో ఫిట్ గా ఉండాల్సిన అవసరం ఉంది.

వైమానిక శాఖ అమ్ముల పొదిలో ఉన్న రఫేల్.. బీ1బీ ల్యాన్సర్ సూపర్ సానిక్ బాంబర్ లు.. తేజస్.. సారంగ్.. సూర్యకిరణ్.. సుఖోయ్ 30-ఎంకే1 లాంటివెన్నో ఉన్నాయి. తేజస్ లాంటి యుద్ధ విమానంలో ఒక యువ ఎంపీ ప్రయాణించటం అప్పుడప్పుడు మాత్రమే జరిగేదిగా చెప్పాలి. రెండు తెలుగు రాష్ట్రాల్లో యువ ఎంపీలు ఉన్నప్పటికీ.. వారెప్పుడూ ఇలాంటి సాహసాలు చేయలేదనే చెప్పాలి.