ఫ్రెండ్ కోరిక తీర్చేందుకు వారణాసికి స్టీవ్ వా

సెలబ్రిటీలే అయినా వారూ అందరి లాంటోళ్లే. వారికీ భావోద్వేగాలు.. బంధాలు.. అనుబంధాలు చాలానే ఉంటాయి. కాకుంటే వారికి సంబంధించిన చాలా విషయాలు బయటకు రావు. అనుకోనిరీతిలో బయటకు వచ్చే కొన్ని విషయాలు తెలిసినప్పుడు ఆశ్చర్యంతో పాటు.. వారిపై గౌరవం అంతకంత పెరుగుతుంది. తాజాగా ఆస్ట్రేలియా క్రికెట్ జట్టు మాజీ కెప్టెన్.. దిగ్గజ ఆటగాడు స్టీవ్ వాకు సంబంధించిన సరికొత్త విషయం బయటకు వచ్చింది.

ఒంటరిగా వారణాసికి వచ్చిన ఆయన.. గంగా నది ధగ్గర ఆయన నిర్వర్తించిన కార్యక్రమం గురించి తెలిస్తే ఆశ్చర్యపోవాల్సిందే. స్నేహితుడి కోరికను తీర్చటం కోసం ఈ దిగ్గజ ఆటగాడు పడిన తపన ముచ్చట పడేలా చేస్తుందనటంలో సందేహం లేదు. ఇంతకీ జరిగిందేమిటంటే.. స్టీవ్ వాకు ఒక మంచి స్నేహితుడు ఉండేవాడు. అతడు ఇస్కాన్ సభ్యుడిగా ఉండేవాడు.

అతడు చనిపోతూ.. తన చివరి కోరికగా తన ఆస్తికల్ని గంగలో కలపాల్సిందిగా స్టీవ్ వాను కోరారు. దీంతో.. ఆయన ప్రత్యేకంగా వారణాసికి వచ్చారు. ఫ్రెండ్ ఆస్తికల్ని గంగలో కలిపేందుకు స్థానిక గైడ్ సాయం తీసుకున్న ఆయన్ను.. మీడియా గుర్తించటంతో.. అసలు విషయం బయటకు వచ్చింది. ఫ్రెండ్ కోసం స్టీవ్ పడిన తపన అందరి దృష్టిని ఆకర్షిస్తోంది.

Like Us on Facebook : https://www.facebook.com/Tupakidotcom/