డ్రామానాయుడు ఇక చాలు..అసెంబ్లీలో జగన్ ​ఫైర్​!టీడీపీ ఎమ్మెల్యేల సస్పెన్షన్​

టీడీపీ ఎమ్మెల్యే నిమ్మల రామానాయుడుపై అసెంబ్లీలో సీఎం జగన్​ ఫైర్ ​అయ్యారు. రామానాయుడు పచ్చి అబద్ధాలు చెబుతూ సభను తప్పుదోవ పట్టిస్తున్నారని మండిపడ్డారు. రామానాయుడు సభలో మాట్లాడకుండా అతడిపై ప్రివిలేజ్​మోషన్​ (సభాహక్కుల తీర్మానం) ప్రవేశపెట్టాలని సీఎం జగన్​ స్పీకర్​ ను కోరారు. ఏపీలో శాసనసభ సమావేశాలు కొనసాగుతున్న విషయం తెలిసిందే. గురువారం అధికార - ప్రతిపక్ష సభ్యుల మధ్య మాటల యుద్ధం జరిగింది. పింఛన్లపై రామానాయుడు మాట్లాడుతూ.. సీఎం జగన్​ మాట తప్పారని పేర్కొన్నారు. ఈ విషయంపై తొలుత మంత్రి కొడాలి నాని స్పందించారు.

ఆ తర్వాత సీఎం జగన్​ జోక్యం చేసుకొని రామానాయుడు తీరును తప్పుపట్టారు. ఆయన రామానాయుడు కాదు డ్రామానాయుడు అంటూ ఎద్దేవా చేశారు. రామానాయుడు పచ్చి అబద్ధాలు చెబుతూ సభను తప్పుదోవ పట్టిస్తున్నారన్నారు. గతంలో సీఎం జగన్​ ఇచ్చిన మాటలను అసెంబ్లీలో వీడియోలు ప్రదర్శించారు. ఉద్దేశపూర్వకంగా సభను తప్పు దోవ పట్టిస్తున్న రామానాయుడుపై సభా హక్కుల ఉల్లంఘన తీర్మానం కోరుతుమన్నారు.

ఆ తర్వాత సభా నాయకుడి సూచన మేరకు టీడీపీ సభ్యుడు రామానాయుడిపై సభా హక్కుల ఉల్లంఘనకు సంబంధించి చర్యలు కొనసాగుతాయని స్పీకర్‌ తెలిపారు. ఈ క్రమంలో టీడీపీ సభ్యులు నిరసన వ్యక్తం చేశారు.. స్పీకర్ పోడియం వైపు దూసుకొచ్చారు. దీంతో 8 మంది టీడీపీ సభ్యులను సస్పెండ్ చేస్తున్నట్లు స్పీకర్ తమ్మినేని ప్రకటించారు. అచ్చెన్నాయడు - రామకృష్ణబాబు - మంతెన రామరాజు - సత్యప్రసాద్ - వీరాంజనేయులు - బెందాళం అశోక్ - జోగేశ్వరరావు తదితరులను స్పీకర్​ సస్పెండ్​ చేశారు.