జానా పంచ్ కి మీడియా షాక్‌!

తెలంగాణ కాంగ్రెస్ శాస‌న‌స‌భా ప‌క్ష నేత జానారెడ్డి మాట్లాడుతుంటే మీడియా ప్ర‌తినిధుల తీరు కాస్త వేరుగా ఉంటుంది. చాలామంది గ‌మ‌నించ‌ని అంశం ఏమిటంటే.. తాను స్ప‌ష్టంగా చెప్పాల‌నుకున్న‌ప్పుడు సూటిగా చెప్పేసే ఆయ‌న‌.. తాను విష‌యాన్ని ట్విస్ట్ చేయాల‌నుకున్న‌ప్పుడు మాటల విశ్వ‌రూపాన్ని ప్ర‌ద‌ర్శిస్తారు. కాకుంటే.. మిగిలిన వారి మాదిరి కాకుండా కాస్త పెద్ద‌రికం వ‌ల్ల వ‌చ్చే ప‌దాలు చాలామందికి మింగుడు ప‌డ‌వు.

కానీ.. జాగ్ర‌త్త‌గా గ‌మ‌నిస్తే మాత్రం ఆయ‌న మాట‌ల్లో లోతు ఇట్టే తెలుస్తుంది. రాజ‌య్య ఇంట్లో జ‌రిగిన అగ్నిప్ర‌మాదం మీద మీడియా స‌మావేశం ఏర్పాటు చేసిన సంద‌ర్భంగా మీడియాకు.. ఆయ‌న‌కు మ‌ధ్య న‌డిచిన సంభాష‌ణ ఆస‌క్తిక‌ర‌మ‌నే చెప్పాలి.

ఎందుకంటే.. త‌న ప్ర‌శ్న‌తో జానాను ఇబ్బంది పెట్టాల‌ని చూసిన మీడియా ప్ర‌తినిధుల‌కు త‌న పంచ్ లాంటి మాట‌ల‌తో ఉక్కిరిబిక్కిరి చేయ‌ట‌మే కాదు.. నోటి వెంట మాట రాకుండా చేశారు. రాజ‌య్య కోడ‌లు సారిక‌.. ముగ్గురు మ‌న‌మ‌లు ప్ర‌మాదంలో (?) మ‌ర‌ణించిన ఉదంతాన్ని ప్ర‌స్తావిస్తూ..  మీకు (కాంగ్రెస్ పార్టీకి) మూడుసార్లు కంప్లైంట్ చేసినా ప‌ట్టించుకోలేని కార‌ణంగానే ఈ ఘోరం జ‌రిగింద‌న్న విమ‌ర్శ‌లున్నాయ‌ని జానారెడ్డిని ప్ర‌శ్నిస్తే.. ఆయ‌న త‌డుముకోకుండా.. ఆమె మూడుసార్లు ప్రెస్ మీట్ పెట్టారు.. మ‌రి మీరేమైనా స‌రిగ్గా క‌వ‌ర్ చేశారా? అంటూ రిటార్ట్ ఇచ్చారు.

ఊహించ‌ని విధంగా జానారెడ్డి నుంచి వ‌చ్చిన పంచ్ కు మీడియా ప్ర‌తినిధుల నోటి వెంట మాట రాని ప‌రిస్థితి. దీంతో.. ఆ విష‌యాన్ని వ‌దిలేసి.. మ‌రో ప్ర‌శ్న‌కు వెళ్లిపోవ‌టం త‌ర్వాత సంగ‌తి. మొత్తంగా త‌న మాట‌తో జానా.. మీడియాకు భారీ పంచ్ వేశార‌నే చెప్పొచ్చు.