బాబు లాగే ఆయనకూ టైం ఉండడం లేదట..

ఏపీ సీఎం చంద్రబాబు ఎప్పుడూ ఒక మాట చెబుతుంటారు. పాలనలో పడి ఇంటి గురించి, ఒంటి గురించి పట్టించుకోవడం మానేశానంటుంటారు. అంతేకాదు.. తన మనవడితో కూడా ఆడుకోలేకపోతున్నానని తెగ మథన పడుతుంటారు. తాజాగా కేంద్ర మంత్రి మనోహర్ పారికర్ కూడా ఆ స్థాయిలో కాకపోయినా కాస్త అదే టోన్ లో తన కష్టాలు చెప్పుకొంటున్నారు. పనిలో పడి అస్సలు తీరికలేక బరువు తగ్గిపోయానంటున్నారు.

పారిక‌ర్ ఈ రోజు ఉద‌యం 7.10 కే అంద‌రిక‌న్నా ముందుగా తన ఓటు హ‌క్కుని వినియోగించుకున్నారు. అనంత‌రం ఆయ‌న మీడియాతో మాట్లాడినప్పుడు, 'ఎందుకు సన్నబడిపోయారని' ఓ విలేక‌రి అడ‌గ‌గా, 'ఢిల్లీలో వుండడం వల్ల నాలుగు కిలోల బరువు తగ్గిపోయాను, నాకు గోవా ఆహారం అంటే ఎంతో ఇష్టం' అని సమాధానం చెప్పారు. అంతటితో ఆగకుండా ‘ఇప్పుడు మీ ఇష్టం.. దీనిని ఏ విధంగా కావాలంటే ఆ విధంగా రాసుకోండి’ అంటూ నవ్వేశారు. గోవాకు సీఎంగా ఉన్నప్పటి కంటే ఢిల్లీ మంత్రిగా బిజీ అయిపోయానన్నట్లుగా పారికర్ మాటల్లో అర్థం ధ్వనించింది.

కాగా గోవాలో బీజేపీ గెలిస్తే పారికర్ మళ్లీ ఆ రాష్ట్ర ముఖ్యమంత్రిగా పగ్గాలు చేపడతారని చాలాకాలంగా వినిపిస్తోంది. ఈ నేపథ్యంలో గోవాయే తనకిష్టం అంటూ పారికర్ చేసిన వ్యాఖ్యలు చర్చనీయమవుతున్నాయి.  అయితే.. తాను పార్టీ మనిషినని, అధిష్ఠానం ఎలా చెబితే అలా నడుచుకుంటానని కూడా పారికర్ చెబుతున్నారు. మరి పార్టీ ఏం చెబుతుందో చూడాలి.

Like Us on Facebook : https://www.facebook.com/Tupakidotcom/