అతివాద గోరక్షకులకు మోడీ వార్నింగ్

గోరక్షణ ముసుగులో దేశంలో జరుగుతున్న దారుణాలు, దాడులపై ప్రధాని మోడీ తొలిసారి సీరియస్ గా స్పందించారు. గోరక్షకులమని చెప్పుకుంటూ  హత్యలు చేస్తూ తీవ్ర పరిణామాలు తప్పవని ఆయన హెచ్చరించారు.  భక్తి పేరిట హత్యలు చేస్తుంటే తీవ్ర పరిణామాలను ఎదుర్కోవాల్సి వుంటుంది. . మనది అహింసా దేశం. గాంధీ నడయాడిన దేశం..  ఆ సంగతి  మరచిపోతే ఎలా? అంటూ ఆయన అన్నారు.
    
మూడు దేశాల పర్యటనను ముగించుకుని నిన్న ఢిల్లీ చేరుకున్న ఆయన, ఈ రోజు  తన సొంత రాష్ట్రమైన గుజరాత్ కు వచ్చి అహ్మదాబాద్ లో జరిగిన ఓ కార్యక్రమంలో పాల్గొన్నారు. సబర్మతీ ఆశ్రమాన్ని ప్రారంభించి 100 సంవత్సరాలు అయిన సందర్భంగా, శత వార్షిక ఉత్సవాలను ప్రారంభించిన ఆయన ఆ తరువాత ప్రజలనుద్దేశించి మాట్లాడారు.  మన దేశంలో చట్టాన్ని చేతుల్లోకి తీసుకునే శక్తి ఎవరికీ లేదని అన్నారు. హింసతో ఏ సమస్యనూ పరిష్కరించలేమని తెలిపారు. ఈ సందర్భంగా మహాత్మా గాంధీ నూలు ఒడికిన రాట్నం ముందు మోదీ కాసేపు కూర్చుని దూది నుంచి దారాన్ని తీశారు.
    
కాగా కొన్నాళ్లుగా దేశంలో గోరక్షకుల పేరుతో కొందరు చూపిస్తున్న దూకుడు, చేస్తున్న అరాచకాలు వివాదాస్పదమవుతున్నాయి. ఇది బీజేపీకి కూడా చెడ్డపేరు తెస్తోంది. ఈ నేపథ్యంలో మోడీ దీనిపై స్పష్టమైన హెచ్చరికలు చేయడంతో కొంతవరకు దారుణాలు తగ్గుతాయని ఆశిస్తున్నారు.

Like Us on Facebook : https://www.facebook.com/Tupakidotcom/