మాట్లాడేది మధ్యలో ఆపేసి ... ఆ ర్యాలీలో రేవంత్ ఉన్నాడా,బాగా దగ్గరోడు అన్న డిప్యూటీ స్పీకర్ !

కేంద్రం కొత్తగా తీసుకొచ్చిన కొత్త సాగు చట్టాలను వెనక్కి తీసుకోవాల్సిందేనని డిమాండ్ చేస్తూ టీపీసీపీ వర్కింగ్ ప్రెసిడెంట్, కాంగ్రెస్ ఎంపీ రేవంత్ రెడ్డి పాదయాత్ర చేపట్టారు. గత కొద్దిరోజులుగా రేవంత్ చేస్తున్న రాజీవ్ రైతు భరోసా పాదయాత్ర మంగళవారం ముగిసింది. ఈ సందర్భంగా రంగారెడ్డి జిల్లా రావిరాలలో రాజీవ్ రైతు రణభేరి సభ నిర్వహించారు. అయితే ఈ సందర్భంగా సభకు వెళ్తున్నా రేవంత్ కాన్వాయ్ ‌పై డిప్యూటీ స్పీకర్ పద్మారావు గౌడ్ కీలక వ్యాఖ్యలు చేశారు.

మంగళవారం లాలాపేటలో టీఆర్ ‌ఎస్‌ పార్టీ సభ్యత్వ నమోదును డిప్యూటీ స్పీకర్ పద్మారావు గౌడ్ ప్రారంభించారు. ఈ సందర్భంగా ఆయన‌ మాట్లాడుతున్న సమయంలో అదే సమయంలో లాలాపేట మీదుగా తార్నాక వైపు రేవంత్‌రెడ్డి వాహన శ్రేణీ ర్యాలీ వెళుతోంది. దీంతో పద్మారావు గౌడ్‌.. తన ప్రసంగాన్ని ఆపి అటు వైపు చూస్తు రేవంత్‌ ఉన్నాడా ఆ ర్యాలీలో...ఆయన నాకు బాగా దగ్గరోడు అంటూ వ్యాఖ్యలు చేశారు. ప్రసంగిస్తూ ఒక్కసారిగా పద్మారావు చేసిన వ్యాఖ్యలు అందర్నీ ఆశ్చర్యానికి గురి చేశారు. దీనితో ఆ  సమావేశం ముగిసే వరకు పద్మారావు వ్యాఖ్యలపై కార్యకర్తలంతా చర్చించుకుంటూ కూర్చున్నారు.