రాహుల్ కు ఘోర ప్ర‌మాదం..జ‌స్ట్ మిస్!

2009లో ఉమ్మ‌డి ఆంధ్ర‌ప్ర‌దేశ్ కు వ‌రుస‌గా రెండో సారి సీఎంగా ఎన్నికైన దివంగ‌త నేత వైఎస్ రాజ‌శేఖ‌ర్ రెడ్డి హెలికాప్ట‌ర్ కూలిన ప్ర‌మాదంలో హ‌ఠాన్మ‌ర‌ణం చెందిన సంగ‌తి తెలిసిందే. సాంకేతిక లోపాలున్న హెలికాప్ట‌ర్ ను వినియోగించ‌డం వ‌ల్లే ఆ మ‌హానేత చ‌నిపోయిన ఘ‌ట‌న దేశ‌వ్యాప్తంగా క‌ల‌క‌లం రేపింది. ఆ త‌ర్వాత కూడా కొంత‌మంది విమానాలు, హెలికాప్ట‌ర్ ల‌లో సాంకేతిక లోపాల వ‌ల్ల అశువులు బాశారు. అయితే, తాజాగా ఈ ఏడాది కూడా సాంకేతిక లోపం వ‌ల్ల ఏఐసీసీ అధ్యక్షుడు రాహుల్ గాంధీకి పెను ప్ర‌మాదం త‌ప్పింద‌న్న వార్త క‌ల‌క‌లం రేపుతోంది. ఓ 20 సెక‌న్లు ఆలస్యంగా ఆయ‌న విమానం ల్యాండ్ అయి ఉంటే ఘోర ప్ర‌మాదం జ‌రిగి ఉండేద‌ని ఓ క‌థ‌నం జాతీయ మీడియాలో వెలువ‌డింది. ఈ ఏడాది ఏప్రిల్ లో జ‌రిగిన ఆ ఘ‌ట‌న తాలూకు వివ‌రాల‌ను డైరెక్టర్ జనరల్ ఆఫ్ సివిల్ ఏవియేషన్ (DGCA)తాజాగా వెల్ల‌డించ‌డం సంచ‌ల‌నం రేపుతోంది.

ఈ ఏడాది కర్ణాటక శాసన సభ ఎన్నికల ప్రచారం సందర్భంగా 2018 ఏప్రిల్ 26న ఢిల్లీ నుంచి రాహుల్ గాంధీ హుబ్బళికి ప్రత్యేక విమానంలో బ‌య‌లుదేరారు. అయితే, ఆ విమానంలో సాంకేతిక లోపం ఏర్ప‌డ‌డంతో అత్యవసరంగా ల్యాండ్ చేయాల్సి వ‌చ్చింది. చిన్న సాంకేతిక లోపం కారణంగానే విమానం అత్యవసరంగా ల్యాండ్ చేశామ‌ని అప్పట్లో DGCA వివరణ ఇచ్చింది. అయితే, ఈ వ్య‌వ‌హారంపై కర్ణాటక డీజీపీ నీలమణి రాజుకు కాంగ్రెస్ నేత‌లు ఫిర్యాదు చేశారు. జాతీయ‌స్థాయి నేత‌లు ప్ర‌యాణిస్తోన్న ఆ విమానం భ‌ద్ర‌త విష‌యంలో నిర్ల‌క్ష్యం వ‌హించ‌డంపై వారు ఆగ్ర‌హం వ్య‌క్తం చేశారు. అయితే, విమానంలో ఆటో ఫైలెట్ సిస్టం సవ్యంగా పని చెయ్యకపోవడం వల్ల‌ సాంకేతిక లోపం ఏర్ప‌డింద‌ని, అందుకే ఎమ‌ర్జెన్సీ ల్యాండింగ్ కు ఆదేశించామ‌ని DGCA తాజాగా వివరణ ఇచ్చింది. ఈ తాజా ప్ర‌క‌ట‌న‌తో  DGCAపై విమ‌ర్శ‌లు వెల్లువెత్తుతున్నాయి.