తమిళనాడు నెక్స్టు సీఎం రజనీకాంత్?

తమిళనాడు శాసనసభలో పళని స్వామి బలపరీక్షకు అన్ని ఏర్పాట్లు చేసుకుంటున్న తరుణంలో తమిళనాడులో వెలసిన పోస్టర్లు సంచలనంగా మారాయి. పన్నీర్ సెల్వం.. పళనిస్వామి.. స్టాలిన్.. ఇలా చాలామంది సీఎం అభ్యర్థులున్నా జనం మాత్రం సూపర్ స్టార్ రజనీకాంత్ సీఎం పదవి చేపట్టాలంటూ పోస్టర్లు వేస్తున్నారు. తమిళనాడు నెక్స్టు సీఎం అంటూ రజనీకాంత్ నిలువెత్తు చిత్రాలతో కనిపిస్తున్న ఈ పోస్టర్లు రాజకీయంగా అనేక ఊహాగానాలకు తావిస్తున్నాయి.
    
తమిళనాడు తదుపరి ముఖ్యమంత్రి తలైవా రజనీకాంత్ అంటూ చెన్నైలో భారీ ఎత్తున పోస్టర్లు వెలిశాయి. నగరవాసులు ఈ పోస్టర్లను ఎక్కడికక్కడ నిలబడి ఆసక్తిగా చూస్తున్నారు. పోస్టర్లను చూసిన వారు రజనీ రాజకీయాల్లోకి వస్తేనే మంచిది అనుకుంటూ ముందుకు సాగుతున్నారు.
    
కాగా రజనీ రాజకీయాల్లో రావాలంటూ ఆయన అభిమానులు ఎప్పటినుంచో డిమాండ్ చేస్తున్నారు. అయితే, రజనీ మాత్రం ఈ విషయంపై ఇంతవరకు నోరు విప్పలేదు. ప్రస్తుతం రాష్ట్రంలో రాజకీయ శూన్యత నెలకొందని... రజనీ రాజకీయాల్లోకి రావడానికి ఇదే సరైన తరుణమని పలువురు అభిప్రాయపడుతున్నారు.  ఇలాంటి సమయంలో చెన్నై నగరం రజనీ పోస్టర్లతో నిండిపోవడం ఆసక్తి రేపుతోంది. ఎవరో కొందరు చేస్తే ఒకటిరెండు చోట్ల మాత్రమే పోస్టర్లు కనిపిస్తాయని.. కానీ, చెన్నై మొత్తం రజనీ పోస్టర్లే నిండిపోవడంతో దీని వెనుక రజనీ లేకపోయినా ఇంకెవరైనా ఉండొచ్చని అంటున్నారు.

Like Us on Facebook : https://www.facebook.com/Tupakidotcom/