‘యువరాజు’ను అన్నేసి మాటలు అనేస్తారా?

కాంగ్రెస్ పార్టీలో మకుటం లేని యువరాజుగా వెలిగిపోయే ఆ పార్టీ ఉపాధ్యక్షుడు రాహుల్ గాంధీ మీద సోషల్ మీడియాలో జోకులు పేలుతున్నాయి. ఆయనపై తమకున్న వ్యతిరేకతను వ్యక్తం చేసేందుకు వ్యంగ్యాన్ని అస్త్రంగా ప్రయోగించటం కనిపిస్తోంది. తాజాగా ఆయన విదేశీ పర్యటనకు వెళ్లిన సంగతి తెలిసిందే. ఈ సందర్భంగా ఆయన ఫారిన్ టూర్ పై జోకుల మీద జోకులు వేయటం సోషల్ మీడియాలో పెరిగింది.

యువరాజుగా కాంగ్రెస్ వారి మనసు దోచుకున్న నేతపై సోషల్ మీడియాలో అన్నేసి మాటలు అనటంపై కాంగ్రెస్ వాదులు తీవ్ర ఆగ్రహాన్ని వ్యక్తం చేస్తున్నా.. జోరు మాత్రం తగ్గకపోవటం గమనార్హం. తన బర్త్ డే పక్క రోజున ఫారిన్ టూర్ కు వెళుతున్నట్లు చెప్పిన రాహుల్.. ఏ దేశానికి వెళుతున్న విషయాన్ని మాత్రం వెల్లడించకపోవటం తెలిసిందే. ఈ విషయాన్ని పరోక్షంగా ప్రస్తావిస్తూ.. వ్యంగ్యాస్త్రాల్ని సంధించటం కనిపిస్తుంది.

‘‘సార్.. మీరు ఎక్కడికి వెళ్తున్నారో కానీ.. తిరిగి భారత్ కు రావొద్దు. మిమ్మల్ని.. మీ తెలివితక్కువ తనాన్ని భరించే శక్తి ఈ దేశానికి లేదు’’ అని ఒకరంటే.. ‘‘మీ ప్రయాణ ఖర్చుల్ని ఎలా చెల్లిస్తారు?’’ అంటూ మరొకరు ప్రశ్నించారు. ఇంకొకరైతే.. ‘‘మలేషియా ఎయిర్ లైన్స్ విమానంలో టికెట్ బుక్ చేసుకోండి రాహుల్ జీ.. మంచి డిస్కౌంట్ ఇస్తారు. మీరూ లబ్థి పొందుతారు.. మీరు వెళ్తున్నందుకు దేశం కూడా లబ్థి పొందుతుంది’’ అంటూ పెద్ద వ్యాఖ్యనే చేశారు. ఇలా సాగిన వ్యంగ్యాస్త్రాల్లో కొన్ని హద్దులు దాటటం కనిపిస్తుంది. ఇవన్నీ ఆయన్ను వ్యతిరేకించే వారికి సంతోషాన్ని కలిగిస్తే.. సమర్థించే వారు మాత్రం తెగ ఫీలైపోతున్నారు.