రేవ్ పార్టీలో బుక్ అయ్యింది షారుక్ తనయుడా?

బాలీవుడ్ లో సంచలనంగా మారిన రేవ్ పార్టీకి సంబంధించిన వివరాలుబయటకు వస్తున్నాయి. తొలుత బాలీవుడ్ కు చెందిన బడా హీరో కుమారుడు ఒకరు ఆ పార్టీలో నార్కోటిక్స్ కంట్రోల్ బ్యూరో (ఎన్ సీబీ) అధికారుల చేతికి చిక్కినట్లు చెబుతున్నారు. అయితే.. ఆ బడా హీరో ఎవరు? అన్న ప్రశ్నకు సమాధానంగా.. బాలీవుడ్ సూపర్ స్టార్ షారుక్ ఖాన్ కుమారుడుగా చెబుతున్నారు. శనివారం రాత్రి ముంబయి శివారులోని క్రూజ్ షిప్ లో భారీ ఎత్తున రేవ్ పార్టీని నిర్వహించారు.

ఈ పార్టీకి దాదాపు 1500 మంది పాల్గొనటమే కాదు.. ఈ పార్టీ కోసం ప్రత్యేకంగా ఢిల్లీకి చెందిన పలువురు పారిశ్రామికవేత్తల పిల్లలు కూడా హాజరైనట్లు చెబుతున్నారు. ఈ రేవ్ పార్టీలో పెద్ద ఎత్తున కొకైన్.. ఎండీని.. ఇతర మత్తు పదార్థాల్ని భారీగా వినియోగిస్తున్నట్లు గుర్తించారు. పోలీసులు అదుపులోకి తీసుకున్న వారిలో షారుక్ కుమారుడు ఉన్నాడన్న మాటతో బాలీవుడ్ ఉలిక్కి పడింది. ఇప్పుడు జాతీయ చానళ్లు అన్నింటిలోనూ ఈ రేవ్ పార్టీ మీదనే చర్చ నడుస్తోంది. సోషల్ మీడియాలోనూ ఇప్పుడీ ఉదంతం పెను సంచలనంగా మారింది.

ఇప్పటికే సరైన సక్సెస్ లేక కిందా మీదా పడుతున్న షారుక్ కు తాజాగా తగిలిన సన్ స్ట్రోక్ దిమ్మ తిరిగేలా మారిందంటున్నారు. మరి.. అదుపులో ఉన్నట్లు చెబుతున్నది(?) షారుక్ కొడుకేనా? కాదా? అన్నది ఎప్పుడు తేలుస్తారు? అతడితో పాటు అధికారులు అదుపులోకి తీసుకున్న వారిలో పలువురు ప్రముఖుల పిల్లలు ఉన్నట్లు చెబుతున్నారు. వారి వివరాలు ఏమిటన్నది ఇప్పుడు ఉత్కంటగా మారాయి.