రజనీ-కమల్.. గాలి తీసేశాడుగా

తమిళ రాజకీయాలు ఎప్పుడూ సినిమా వాళ్లతోనే ముడిపడి ఉంటాయి. దశాబ్దాలుగా తమిళనాడును ఏలుతూ వచ్చింది సినిమా వాళ్లే. ఈ కోవలోనే అధికారం చేపట్టడానికి ఒకరికిద్దరు సూపర్ స్టార్లు రెడీ అయిపోయారు. ఓవైపు రజినీకాంత్.. మరోవైపు కమల్ హాసన్ రాజకీయ రణరంగంలోకి దూకేస్తున్నారు. తమిళనాట రాజకీయ పరిస్థితుల ప్రకారం చూస్తే వీరికి మంచి ఆదరణే ఉంటుందని.. ఇద్దరూ చేయి చేయి కలిపితే తమిళనాడు ఎన్నికల్లో తిరుగులేని ఫలితాలు రాబట్టవచ్చని విశ్లేషకులు అంటున్నారు. కానీ వీళ్లను వ్యతిరేకించే వాళ్లు కూడా లేకపోలేదు. ముఖ్యంగా భారతీయ జనతా పార్టీ సీనియర్ నేత సుబ్రహ్మణ్య స్వామి రజినీ.. కమల్ ల మీద ఏ రేంజిలో చెలరేగిపోయాడో తెలిసిందే. ఇప్పుడు ఆ పార్టీకే చెందిన మరో నేత లైన్లోకి వచ్చాడు.

బాలీవుడ్ సీనియర్ నటుడు.. భాజపా ఎంపీ శత్రుఘ్న సిన్హా.. రజినీకాంత్-కమల్ హాసన్ ల రాజకీయ రంగ ప్రవేశంపై ప్రతికూల వ్యాఖ్యలు చేశాడు. నిజానికి శత్రుఘ్న భాజపాకు డబ్బా కొట్టే వ్యక్తేమీ కాదు. ఆ పార్టీలో ఆయన్ని రెబల్ గా భావిస్తారు. అయినప్పటికీ ఆయన రజినీ-కమల్ ల మీద నెగెటివ్ కామెంట్స్ చేశారు. రాజకీయాల్లోకి రాబోయే సినిమా నటులు.. పక్కా ప్రణాళిక ప్రకారం అడుగుపెట్టాల్సి ఉంటుందని.. ఐతే రజినీ-కమల్ లకు అలాంటి ప్రణాళిక ఉందని తాను భావించడం లేదని అన్నారు. వాళ్లకో ప్లాన్ ఉంటే మంచిదే అన్నారు. చాలా వరకు సినీ నటులు తమకున్న గ్లామర్.. ఫాలోయింగ్ ను చూసుకుని గుడ్డిగా రాజకీయాల్లోకి వచ్చేస్తుంటారని.. వీళ్లు కూడా అదే తరహా అనుకుంటున్నానని శత్రుఘ్న అన్నారు. రజినీ-కమల్ రాజకీయాల్లో విజయవంతం అవుతారని తాను భావించడం లేదని ఆయన అభిప్రాయపడ్డారు. వాళ్ల మీద తనకు వ్యక్తిగతంగా వ్యతిరేకత ఏమీ లేదని చెప్పారు.