మంచి పార్టీ వ‌స్తే రాజ‌కీయాల్లోకి వ‌స్తాన‌న్న హీరో

రాజ‌కీయాల్లోకి వ‌స్తాన‌ని చెబుతున్నారు నాటి సినీ హీరో.. ఇప్పుడు క్యారెక్ట‌ర్ ఆర్టిస్ట్‌గా న‌టిస్తున్న సుమ‌న్‌. ద‌శాబ్దాల కింద‌ట హీరోగా ఒక సంచ‌ల‌నం సృష్టించిన సుమ‌న్‌..త‌ర్వాతి కాలంలో అనుకోని రీతిలో వివాదాల్లో ఇరుక్కొని జైలుకు వెళ్ల‌టం.. సినిమాల‌కు దూరం కావ‌టం తెలిసిందే.

జైలు నుంచి బ‌య‌ట‌కు వ‌చ్చిన త‌ర్వాత త‌న కెరీర్‌ ను మ‌ళ్లీ ప్రారంభించిన ఆయ‌న‌.. త‌న మీద వ‌చ్చిన ఆరోప‌ణ‌ల్ని కుట్ర‌గా అభివ‌ర్ణిస్తారు. కొంద‌రి కుట్ర‌కు తాను బ‌లి అయిన‌ట్లుగా ఆయ‌న వాపోతారు. నాటి నుంచి నేటి వ‌ర‌కూ ఎలాంటి ఆరోప‌ణ‌లు లేకుండా ఉన్న ఆయ‌న‌.. త‌న‌లోని రాజ‌కీయ అభిలాష‌ను బ‌య‌ట‌పెట్టారు.

వ‌చ్చే సార్వ‌త్రిక ఎన్నిక‌ల నాటికి మంచి పార్టీ కానీ వ‌స్తే.. అందులో చేరి రాజ‌కీయంగా సేవ చేయ‌నున్న‌ట్లుగా వెల్ల‌డించారు. శ్రీకాకుళం జిల్లా ప‌లాస ఎమ్మెల్యే గౌతు శివాజీ ఇటీవ‌ల అనారోగ్యానికి గుర‌య్యారు. తాజాగా ఆయ‌న్ను ప‌రామ‌ర్శించిన సుమ‌న్‌.. రాజ‌కీయాల్లో త‌న ఎంట్రీ గురించి చెబుతూ.. ఈ వ్యాఖ్య‌లు చేశారు. ఎన్నిక‌ల నాటికి మంచి పార్టీ రావాలంటే.. ఇప్పుడున్న పార్టీలు మంచివి కావా? అన్న ప్ర‌శ్న రాక మాన‌దు. రాజ‌కీయాల్లోకి వ‌స్తానంటూ.. ఇప్పుడున్న పార్టీల్ని ఇలా చిన్న‌బుచ్చ‌టం స‌రైన‌దేనా?


Like Us on Facebook : https://www.facebook.com/Tupakidotcom/