కరోనా పాజిటివ్ వున్నా లవర్ తో లేచిపోయింది అంట!

వాళ్లిద్దరూ ప్రేమించుకున్నారు. పెళ్లి కూడా చేసుకుందామని అనుకున్నారు. ప్రియుడు విదేశాల్లో సంపాదిస్తున్నాడు. ప్రియురాలు తమిళనాడులోని మధురైలో ఉంటోంది. అయితే కరోనా కారణంగా వీరిద్దరికి ఎడబాటైంది. ప్రియుడు విదేశాల నుంచి రావడం ఆలస్యమైంది.  ఎయిర్ పోర్టులో ఐసోలేషన్ కు వెళ్లాడు. ఆస్పత్రి నుంచి తప్పించుకొని ప్రియురాలిని లేపుకెళ్లాడు. ఈ ఉదంతం తమిళనాట కలకలం రేపింది.

తమిళనాడులోని శివగంగైకు చెందిన విజయ్ విదేశాల్లో ఉద్యోగం చేస్తున్నాడు. మధురైకి చెందిన యువతితో ప్రేమలో ఉన్నాడు. విదేశాల నుంచి రాగానే పెళ్లి చేసుకుందామనుకున్నారు. అయితే యువతి తల్లిదండ్రులు వీరి ప్రేమను అంగీకరించలేదు. వేరే యువకుడితో పెళ్లి ఏర్పాట్లు చేశారు. విషయం తెలుసుకున్న యువకుడు విదేశాల నుంచి మధురై వచ్చాడు. విమానాశ్రయంలో కరోనా స్క్రీనింగ్ కు చిక్కి మధురై ఆస్పత్రిలో ఐసోలేషన్ లో ఉంటున్నాడు. అతడికి కరోనా నిర్ధారణ కోసం రక్తం తీసి పరీక్షలకు పంపారు.

తన ప్రేయసికి పెళ్లి జరుగుతుండడం.. ఆస్పత్రిలో చిక్కుకుపోవడంతో యువకుడు గురువారం రాత్రి ఆస్పత్రి నుంచి తప్పించుకున్నాడు. ప్రేయసిని కలిసి ప్రియురాలితో పారిపోయాడు.

ఆస్పత్రిలో కనిపించకుండా పోయిన విజయ్ ను పోలీసులు వెంటాడి - వేటాడి కనిపెట్టి అదుపులోకి తీసుకున్నారు. అతడితోపాటు ఉన్న యువతికి కూడా కరోనా టెస్టుల కోసం ఆస్పత్రికి తరలించారు. ఇలా ప్రేమ కోసం కరోనా భయం ఉన్నా ఈ ప్రియుడు ధైర్యం చేయడం అందరినీ ముక్కున వేలేసుకునేలా చేసింది.