ధోనీతో సెల్ఫీ కోసం అంత రిస్క్ చేసింది!

సినిమా స్టార్స్ అయినా, క్రికెటర్స్ అయినా తమ తమ అభిమానులకు వారిని చూడటమే ఒక ఆనందం! ఏ అభిమానికి వారి వారి అభిమాన సెలబ్రెటీలు ముఖ్యం, ఇష్టం.. కాదు కాదు అంతకుమించి! ఈ విషయంలో టీమిండియా కెప్టెన్ మహేంద్ర సింగ్ ధోనీ కి ఉన్న ఫాలోయింగ్ గురించి కూడా ప్రత్యేకంగా చెప్పనవసరంలేదు. భారతదేశంలోనే కాదు ప్రపంచవ్యాప్తంగా కూడా ధోనీకి ఉన్న ఫ్యాన్స్ ఫాలోయింగ్ సూపర్. ఇక సొంతూరు రాంచీలో సంగతైతే ఇంక ప్రత్యేకంగా చెప్పేదేముంది. ఈ క్రమంలో ధోనీ సొంతూరులోని ఒక అమ్మాయి ధోనీతో సెల్ఫీ దిగాలని చిన్న పాటి సాహసమే చేసింది.

రాంచీలోని ఉమెన్స్ కాలేజీ విద్యార్థిని ఆరాధ్యకు ధోనీ అంటే చాలా ఇష్టం, ఇక అతనితో సెల్ఫీ దిగాలన్నది అయితే ఏకంగా కలే. అలా కలలు కంటున్న ఒకసమయంలో రాంచీలో జరిగిన భారత్ - న్యూజిలాండ్ నాలుగో వన్డే తర్వాత గత నెల 26న ధోనీ తన హమ్మర్ కారులో విమానాశ్రయానికి బయల్దేరాడు. ఈ విషయం తెలుసుకున్న ఆరాధ్య ఈ అవకాశాన్ని వదులుకునేది లేదని భావించి స్కూటీ వేసుకుని తన అభిమాన క్రికెటర్ కారును ఫాలో అయ్యింది. ఈ ఊపులో మార్గమధ్యలోనే ధోనీ కారును ఛేజ్ చేసిన ఆరాధ్య విమానాశ్రయం వరకు ఆగకుండా అలాగే వెళ్లింది. ఆఖరికి ధోనీ విమనాశ్రయానికి చేరుకోగానే టర్మినల్ వద్ద అతణ్ని కలసింది ఆరాధ్య. తనకు ధోనీ అంటే ఎంత ఇషటమో చెప్పి, తన సెల్ఫీ కోరికను బయటపెట్టింది. దీంతో ఆమె కోరికను మన్నించిన ధోనీ ఆమెతో సెల్ఫీ దిగాడు. ఇంక చెప్పేదేముంది... ఒక్క క్షణంలో ఆ ఫొటోను సోషల్ మీడియాలో పోస్ట్ చేసి ముచ్చట తీర‍్చుకుంది ఆరాధ్య.

Like Us on Facebook : https://www.facebook.com/Tupakidotcom/